म पदका लागि प्रधानमन्त्री भएको हैन, केही गर्नुछः ओली

४ साउन, काठमाडौं । प्रधानमन्त्री केपी शर्मा ओलीले आफू पदका लागि मात्र प्रधानमन्त्री नबनेको बताएका छन् । उनले देशमा केही गर्न आफू प्रधानमन्त्री भएको र केही महत्वपूर्ण उदेश्य पुरा गर्नुपर्ने दायित्व आफूमाथि भएको बताएका छन् । 

नेपाल उद्योग परिसंघसँगका पदाधिकारीसँगको छलफलमा ओलीले आफू यसअघि नै प्रधानमन्त्री बनिसकेकाले पदका लागि मात्रै पुनः जिम्मेवारीमा आएको नबुझ्न आग्रह गरे । देश धेरै समस्यामा फसेको छ, अर्थतन्त्रलाई सुदृढ बनाउनुपर्ने दायित्व छ, समस्याको समाधान गर्न केही कुराहरू परिवर्तन गर्नुपर्ने अवस्था छ । त्यसैले निजी क्षेत्रले यो सरकारप्रति आशा, भरोसा राखेर मिलेर काम गर्नुपर्छ, उनले भने । 

करका दर अनुहार हेरेर परिवर्तन गर्न नहुने र गलत नीति लिएका बेला निजी क्षेत्रले विरोध गर्न सक्नुपर्ने धारणा राख्दै प्रधानमन्त्री ओलीले अर्थतन्त्रलाई चलायमान बनाउन मौद्रिक नीति कठोर हुन नहुनेमा जोड दिए । त्यस अवसरमा अध्यक्ष राजेशकुमार अग्रवालले विगत तीन वर्षदेखि शिथिल अर्थतन्त्रलाई उकास्न सरकारले उच्च प्राथमिकताका साथ काम गर्न आग्रह गरे । 

उत्पादनशील र निर्माण क्षेत्र बढी प्रभावित हुँदा बाह्य क्षेत्र उत्साहजनक भए पनि आन्तरिक अर्थतन्त्र अझै समस्यामा रहेको बताउँदै उनले निजी क्षेत्रको मनोबल बढाउनुपर्नेमा जोड दिए । मौद्रिक नीतिमार्फत शिथिल रहेको अर्थतन्त्रलाई चलायमान बनाउनसक्नुपर्ने अध्यक्ष अग्रवालको भनाइ थियो ।