रौतहटमा मुस्लिम समुदायको मेलामा झडप, सम्झाउन गएका १९ प्रहरी घाइते

४ साउन, रौतहट । रौतहटको राजपुरमा मुस्लिम धर्मावलम्बीहरूले पर्व मनाइरहेको एक मेलामा झडप हुँदा सुरक्षाकर्मी घाइते भएका छन् । मुस्लिम समुदायले मोहरम ताजिया (दाहा) मेला भनाइरहेका बेला एक्कासी झडप भएको हो । झडपमा १९ जना सुरक्षाकर्मी घाइते भएको बताइएको छ । 

उश्रृखल समूहबाट भएको ढुंगामुढा प्रहारबाट नेपाल प्रहरीका १७ र सशस्त्र प्रहरीको २ जना गरेर १९ जना सुरक्षाकर्मी घाइते भएको सशस्त्र प्रहरी बल नेपाल नं. ११ गणका एसपी विक्रम हुमागाईंले जानकारी दिए । उनीहरूको अवस्था सामान्य रहेको छ । 

अहिले मेलामा नेपाल प्रहरीका एसपी दिलिप घिमिरे र सशस्त्र प्रहरीका एसपी विक्रम हुमागाईंको कमान्डमा प्रहरी टोली परिचालन गरिएको छ । राजपुर नगरपालिका वडा नम्बर ६ कुडियामा मुस्लिम समुदाय मेला मनाउन घरेलु हतियारसहित उपस्थित भएका थिए ।

दाहाको झण्डा गाड्ने क्रममा होहल्ला भएपछि उनीहरूले सुरक्षाकर्मीमाथि ढुंगामुढा गरेका थिए । प्रहरीले स्थिति नियन्त्रणमा लिन केही सेल अश्रु ग्यास प्रहार गरेको छ । दाहा नचाउने र झन्डा गाड्ने क्रममा धकेलाधकेल भएको र सहभागी ढुंगामुढामा उत्रिएको प्रहरीले जनाएको छ ।