माइक्रोसफ्टमा एक्कासी समस्या आएपछि विश्वभर सूचना क्षेत्रको काम ठप्प, बैंक र विमानस्थल बन्द

४ साउन, काठमाडौं । विश्वभर आइटी समस्या देखिएको छ । माइक्रोसफ्टको कार्यालयले समाधानको पहल भइरहेको बताए पनि सुधार नभएको बताइएको छ । युरो, अमेरिका,अस्ट्रेलिया लगायतका देशमा सूचना प्रविधि क्षेत्रमा अचानक आज शुक्रबार समस्या आएको छ । जसका कारण कम्प्युटरहरूले काम नगर्दा विमान र बैंकहरु बन्दगर्नु परेको छ ।  
 
विमानहरू ग्राउन्डेड भएका छन् भने बैंक, टेलिकम्युनिकेसनलगायत क्षेत्रमा समस्या आएको छ । बेलायतको लन्डन, नेदरल्यान्डसको आर्मस्टर्डम, स्कटल्यान्ड, अस्ट्रेलिया, जर्मनीलगायत मुलुकमा हवाई सेवामा अवरोध भएको छ । बेलायतमा स्काई न्यूज अफ एयर बन्द भएको छ । बेलायतका रेल कम्पनी पनि प्रभावित भएका छन् । 

माइक्रोसफ्टको सफ्टवेयरमा समस्या भएर यस्तो अवरोध आएको जनाइएको छ । माइक्रोसफ्टले समस्याको सम्बोधनका लागि पहल भइरहेको जनाएको छ । बीबीसीका अनुसार कयौँ उडानहरू रद्द भएका छन् । सञ्चार सेवाले काम गर्न छोडेको छ । बेलायतको स्काइ च्यानलले आफ्नो लाइभ गर्न नसकेको बताएको छ ।

यस्तै रुसी विश्व च्यानल आटीका अनुसार अमेरिका, जर्मनी, स्पेन, बेलायत लगायतका देशहरूमा सञ्चार क्षेत्रमा समस्या आउँदा समस्या भएको हो । विमानस्थल मात्रै होइन पूर्वाधार, बैंक तथा सञ्चार क्षेत्रमा पनि यस्ता समस्या देखिएको आरटीले उल्लेख गरेको छ । यो घटनालाई प्राविधिक कारणले हो वा कुनै ह्याकिङ आक्रमणको कारणले हो भनेर कुनै खुलासा गरिएको छैन । रुस तथा चीनमा भने यस्तो समस्या आएको सार्वजनिक भइसकेको छैन ।