न्यूरोड विवादः वडा नम्बर २२ का वडाध्यक्ष चिनकाजी श्रेष्ठले बालेनविरुद्ध आन्दोलनको नेतृत्व गर्ने

साउन, काठमाडौं । न्युरोड क्षेत्रको फुटपाथ विस्तारको विरोधमा स्थानीय उत्रिएका छन् । काठमाडौं महानगरका मेयर बालेन शाहविरुद्ध नाराबाजीमा उत्रिएका स्थानीयको नेतृत्व भने २२ नम्बर वडाका वडाअध्यक्ष चीनकाजी श्रेष्ठले गरेका छन् । उनले यो काम रोकाएर मेयर बालेनलाई झुकाई छाड्ने बताएका छन् । उनले मेयर बालेन विरुद्ध नाराबाजी गर्न स्थानीयलाई उक्साएका छन् ।  

श्रेष्ठ नेतृत्वमा आएका स्थानीय र महानगर प्रहरीबीच झडप पनि भएको छ । महानगर प्रतिनिधिहरू रहेको ठाउँमा स्थानीय नाराबाजी गर्दै छिर्न खोजेपछि महानगर प्रहरीले रोक्ने क्रममा दुवै पक्षबीच धकेलाधकेल भएको थियो । सडक साँघुरो बनाएर फुटपाथ फराकिलो बनाउन नहुने माग स्थानीयको छ । उनीहरूको नेतृत्व महानगरको २२ नम्बर वडाध्यक्ष चीनकाजी श्रेष्ठले नेतृत्व गरिरहेका छन् ।

विरोध प्रदर्शनको क्रममा अप्रिय घटना हुन सक्ने भन्दै ठूलो संख्यामा प्रहरी परिचालन गरिएको छ । नगर प्रहरी पनि उल्लेख्य संख्यामा खटिएका छन् । उच्च अदालत पाटनले फुटपाथ विस्तार नरोक्न सडक विभागका नाममा अन्तरिम आदेश दिएपछि महानगरले बुधबारदेखि पुनः फुटपाथ विस्तारको काम सुरु गरेको थियो ।

बिहीबार बिहानैदेखि स्थानीयको भीड न्युरोड क्षेत्रमा ओर्लिएको थियो । उनीहरूले मेयर बालेन शाह र नगर प्रहरी विरुद्ध नाराबाजी गर्दै प्रदर्शन गरिरहेका छन् । यसअघि पनि न्युरोडमा फुटपाथ विस्तारका लागि सडकको कालोपत्रे समेत भत्काइसकेको अवस्थामा सडक डिभिजन कार्यालयले हस्तक्षेप गरेर सामान जफत गरेको थियो ।