लाइन काटिएका उद्योगमा बिजुली जोड्न कुलमानलाई प्रधानमन्त्रीको निर्देशन

४ साउन, काठमाडौं । प्रधानमन्त्री केपी शर्मा ओलीले उद्योगमा विद्युत लाइन जोड्न नेपाल विद्युत प्राधिकरणलाई निर्देशन दिएका छन् । प्रधानमन्त्री ओलीले डेडिकेटेड र ट्रंकलाइन विद्युत बक्यौता विवाद समाधानका लागि शुक्रबार उद्योग, ऊर्जा एवं प्राधिकरणका पदाधिकारी र उद्योगहरूबीच सामूहिक छलफल गर्दै प्राधिकरणका प्रबन्ध निर्देशक कुलमान घिसिङलाई काटिएका उद्योगमा विद्युत लाइन आजै जोड्न निर्देशन दिएका हुन ।

‘विद्युतसम्बन्धी समस्या मन्त्रिपरिषदबाट मिलाउँदै जाने र अहिलेलाई बिजुली जोडिदिन’ भनेर प्रधानमन्त्री ओलीले निर्देशन दिएका थिए । प्रधानमन्त्रीको निर्देशनपछि कुलमानले प्राधिकरणको बोर्डको बैठक बसेर निर्णय गरेर मात्रै लाइन जोड्ने बताएका थिए ।

विद्युत प्राधिकरणले केही समयअघि ट्रंक र डेडिकेटेड लाइन प्रयोगको बक्यौता नतिर्ने ठूला उद्योगको लाइन काट्न सुरु गरेको थियो । यसअघि जगदम्बा स्टिल, घोराही सिमेन्ट उद्योग, रिलायन्स स्पिनिङ मिल्स र अर्घाखाँची सिमेन्टको लाइन प्राधिकरण काटेको थियो ।