त्रिशूली नदीमा बेपत्ताको खोजीका लागि भारतबाट विशेष उपकरणसहितको टोली आउँदै

५ साउन, काठमाडौं । चितवनको नारायणगढ–मुग्लिन सडकखण्डको सिमलतालस्थित त्रिशूली नदीमा बेपत्ता भएका दुईवटा बस र यात्रुको खोजीका लागि भारतीय उद्धार टोली आउने भएको छ । 

आज भारतबाट विशेष उपकरणसहित १० जनाको टोली बस र यात्रुको खोजीका लागि आउने भएको हो। भारतबाट खटिएको उद्धार टोली शुक्रबार राति नै हिँडेको र आज घटनास्थल पुग्ने गृहमन्त्रलाय विपद् महाशाखा प्रमुख भीष्मकुमार भूसालले जानकारी दिए ।

गत असार २८ गते शुक्रबार बिहान सिमलतालमा पहिरोसँगै खसेका दुई बसमा ६५ यात्रु रहेकोमा तीनजनाले पौडिएर ज्यान जोगाएका थिए । ६२ यात्रु बेपत्ता भएकोमा हालसम्म २३ जनाको शव फेला परेको छ । मृतकमध्ये १५ जनाको सनाखत भएको छ । आठ पुरुष र एक महिला गरी नौ शवको सनाखत हुन सकेको छैन ।