कानुन सचिव बन्ने दौडमा थिए अधिकारी, मौका नपाउने देखेर न्याय सेवाबाटै दिए राजीनामा

५ साउन, काठमाडौं ।  तीन वर्षसम्म राजनीतिक कोपभाजनमा परेर अन्यत्र सरुवा नपाएपछि नेपाल न्याय सेवाका सचिव तोयानाथ अधिकारीले पदबाट राजीनामा दिएका छन् । उनको राजीनामा स्वीकृत भइसकेको र उनको ठाउँमा रक्षा मन्त्रालयका एक जना सहसचिवलाई बढुवा गरेर पठाउने तयारी गरेको प्रधानमन्त्री कार्यालय निकट स्रोतले जानकारी दिएको छ । 

मन्त्रिपरिषदले उनको राजीनामा स्वीकृत गरेको कुरा सार्वजनिक गरेको छैन् । सचिवमा बढुवा भएको साढे तीन वर्षसम्म पनि सरकारले आयोगहरूमै थन्क्याएपछि उनले समय अगावै राजीनामा दिए । आगामी आगामी २८ मंसिरमा ५८ वर्षीय उमेर हदका कारण अवकाश जानुपर्ने अधिकारीले पाँच महिना अगाडी नै राजीनामा बुझाए । 

अधिकारीले मुख्यसचिव बैकुण्ठ अर्यालकै समयमा राजीनामा दिए पनि रोकेर राखिएको थियो ।  २०७७ चैत ५ गते सचिवमा बढुवा भएका अधिकारीले झन्डै ३ वर्ष ४ महिना सचिव भएर काम गरे । यसअघि सत्य निरुपण तथा मेलमिलाप आयोग र नेपाल कानुन आयोगमा सचिवको भूमिकामा निभाएका थिए । अधिकारी कानुन सचिव बन्ने दौडमा थिए । तर, पाएनन् । 

नेपाल कानुन समूहका ४ जना सचिव रहेका छन् । प्रधानमन्त्री तथा मन्त्रिपरिषद्को कार्यालयमा उक्त समूहकी गड्तौला सचिव थिइन् । उनले कायममुकायम मुख्यसचिव बन्ने सौभाग्य प्राप्त गरिन् ।

कानुन न्याय तथा संसदीय व्यवस्था मन्त्रालयमा फणीन्द्र गौतम र सत्य निरुपण तथा मेलमिलाप आयोगमा उदयराज सापकोटा सचिव रहेका छन् । नेपाल कानुन आयोगमा भने कानुन समूहका तोयानाथ अधिकारी सचिव थिए । २०५० सालमा निजामती सेवा प्रवेश गरेका अधिकारीले ३१ वर्षको कार्यकाल सकाएर आइतबार बिदा हुँदैछन् ।