ओली प्रधानमन्त्री भएपछि दोहोरिएर गभर्नर बन्ने रणनीतिमा अधिकारी

५ साउन, काठमाडौं । कार्यकाल सकिन लागेका राष्ट्र बैंकका गभर्नर महाप्रसाद अधिकारी फेरी दोहरिएर गभर्नर बन्ने रणनीतिमा लागेका छन् । उनले आफू फेरी गभर्नर बनेर आउने संकेत सार्वजनिक कार्यक्रमहरूमा पनि दिन थालेका छन् । उनले हालै बैंकर र शेयरबजारका लगानीकर्ता भएको एक कार्यक्रममा कार्यकालको अन्तिम मौद्रिक नीति भएपनि पहिलो बन्न सक्ने बताएका छन् ।   

गभर्नर अधिकारीको कार्यकाल सकिन अब धेरै समय छैन । अधिकारी २०७६ चैत २४ गते गभर्नरमा नियुक्त भएका थिए । तत्कालीन अर्थमन्त्री डा. युवराज खतिवडाको संयोजकत्वमा रहेको सिफारिस समितिले नयाँ गभर्नरका लागि अधिकारीसहित डेपुटी गभर्नर चिन्तामणि शिवाकोटी र  पूर्वसचिव केशव भट्टराईको नाम सिफारिस गरेको थियो । तर अधिकारीले बाजी मारेका थिए । 

त्यसअघि राष्ट्र बैंकमा गभर्नर पद खाली हुनै लाग्दा तत्कालीन डेपुटी गभर्नर महाप्रसाद अधिकारीसहित तीन जनाको नाम गभर्नरको लागि सिफारिस भएको थियो । सिफारिस कर्ता थिए, तत्कालीन अर्थमन्त्री डा. रामशरण महत । एक डेपुटी गभर्नरसहित कम्तीमा तीन जनाको नाम सिफारिस गर्नै पर्ने प्रावधान अन्तर्गत उनको पनि नाम सिफारिस भएको थियो ।

तर, त्यतिबेला डा. चिरञ्जीवी नेपालले गभर्नरको बाजी मारेका थिए । त्यतिबेला डा. नेपाल तत्कालीन प्रधानमन्त्री सुशील कोइरालाका आर्थिक सल्लाहकार थिए । प्रधानमन्त्री हाबी हुने गभर्नरको नियुक्ति प्रकृयामा त्यतिबेला नेपालले नै बाजी मारेपछि अधिकारीको गभर्नरको दौड रोकिएको थियो । चिरञ्जीवी नेपालसँग दुई वर्ष काम गरेर अधिकारी ०७३ सालमा डेपुटी गभर्नरको कार्यकाल पूरा गरी राष्ट्र बैंकबाट बाहिरिएका थिए । 

तिनै अधिकारीले त्यसको पाँच वर्षपछि गभर्नरमा बाजी मारेका थिए । अहिले पनि ओली प्रधानमन्त्री र उनको हर्ताकर्तामा डा. युवराज खतिवडा आएका छन् । यी दुवै शक्तिको भरमा उनी राष्ट्र बैंकमा फेरी दोहरिने मनस्थिति बनाएर लविङमा लागेका छन् । उनले फेरी गभर्नर बन्ने मौका पाए राष्ट्र बैंकमा गभर्नर बन्ने सपना बोकेका डेपुटी गभर्नरहरूको पालो नआउने सम्भावना बढेको छ । अधिकारी एमालेको तर्फबाट गभर्नर भएकाले यो पटक कांग्रेसले दावी गर्ने सम्भावना पनि छ । 

सहमति सरकार भएकाले सरकारको सन्तुलन मिलाउन पनि कांग्रेसले राष्ट्र बैंक माग्न सक्छ । तर, ओली ट्युन मिलाउने पक्षमा छन् । अर्थ मन्त्रालय र राष्ट्र बैंक प्रधानमन्त्रीकै दलको हुनुपर्छ भन्ने ओलीको दावी रहनसक्छ । यसले अर्थमन्त्री एमालेको र राष्ट्र बैंकमा पनि एमालेकै गभर्नर बन्नुपर्छ भन्ने ओलीको अडान रहन सक्छ । तर, ओलीले महाप्रसाद अधिकारीलाई नै गभर्नर दोहोर्याएर बनाउने सम्भावना भएपनि खतिवडाकाे उम्मेदवार अर्कै हुनसक्ने अनुमान गर्न थालिएकाे छ । राष्ट्र बैंक भित्रै पनि एमाले निकट डेपुटी गभर्नर छन् ।