संस्थाका लागि भन्दै दाताबाट व्यक्तिको खातामा पैसा मगाएर व्यक्तिकै नाममा किनियो जग्गा

६ साउन, बर्दिया । संस्थाको नाम देखाएर दातालाई व्यक्तिगत खातामा पैसा हाल्न लगाएर संस्थाको नाममा किन्नुपर्ने जग्गा पनि व्यक्तिकै नाममा गराएपछि बर्दियाको एक सामुदायिक विकास संस्थाका पदाधिकारी विवादमा तानिएका छन् । संस्थाको नाम देखाएर १ करोड ४० लाख रकम व्यक्तिको खातामा मगाएर जग्गा पनि व्यक्तिकै नाममा दर्ता गराएपछि विवाद आएको हो ।  

घटना बर्दियाको गुलरिया नगरपालिकामा रहेको सामुदायिक विकास संस्थाको हो । संस्थाका अध्यक्ष कालुराम विश्वकर्मा र सोही संस्थामा कार्यरत मानबहादुर विश्वकर्माले मिलेमतो गरी पैसा व्यक्तिका नाममा मगाएको आरोप लगाइएको छ । दाताले करिब १ करोड ४० लाख  रुपैया दिएको  तर, संस्थाका कार्यकारी निर्देशकले सो रकमबाट संस्थाका नाममा जग्गा नकिनि व्यक्तिका नाममा किनेको संस्थाका अन्य पदाधिकारीहरु बताउँछन् । 

सो संस्थाका एक सदस्यले दिएको जानकारी अनुसार इसाई धर्मको प्रचार गर्न र यस धर्ममा लागेका कोभिड पीडितलाई सहयोग गर्न भनेर सो रकम मागिएको थियो । उक्त समयमा रोजगारी गुमाएका इसाई धर्मावलम्बीका लागी रोजगारी दिने भन्दै गुलरिया नगरपालिका ५ मा डिपार्टमेन्टल स्टोर संचालन गर्ने भनिएको थियो । यो उद्देश्य देखाएपछि न्युजिल्यान्डका दाता डगलस किम्लेसले रकम पठाएका थिए । 

तत्कालीन सामुदायिक बिकास संस्थाका कार्यकारी निर्देशक हाल प्लान नेपालमा कार्यरत मानवीर विश्वकर्माले सो रकम व्यक्तिगत रुपमा प्रयोग गरी गुलरिया नगरपालिका वार्ड न ५ मा ४ कठ्ठा जग्गा आफ्नो नाममा खरिद गरेको सो संस्थाका पदाधिकारीहरु बताउँछन् ।  । यो जग्गा संस्थाका नाममा खरिद हुनुपर्ने थियो । तर, मानबीरले संस्थाको लागी खरिद गर्नु पर्ने जग्गा आफ्नो नाममा बनाएको भन्दै सामुदायिक विकास संस्थाका कार्यसमिति सदस्यहरूले आपत्ति जनाएका छन । 

मानवीर विश्वकर्माले खरिद गरेको ४ कठ्ठा जग्गा कित्ता नम्बर २६४५ रहेको छ । यस विषयमा मानबहादुर विश्वकर्मासँग बुझ्दा उनले रकम आएको बताउँदै संस्थाको नाममा आउनु पर्ने रकम आफूलाई विश्वास गरी मन जितेर पठाएको बताए । जग्गा पनि खरिद गरिएको भन्दै तत्कालीन परिस्थिति अनुसार नै काम भएको दावी उनले गरे । संस्थाका अध्यक्ष विश्वकर्माले जग्गा आफ्नो नाममा किनेको नभई सस्थामा कार्यरत अर्थात कार्यकारी निर्देशक मानविर विश्वकर्माले आफनो नाममा सोहि रकमले जग्गा किनेको बताएका छन् ।