प्रधानमन्त्रीले संसदमा खुलाए खास दल मिल्नुको कारण

६ साउन, काठमाडौं । प्रधानमन्त्री केपी शर्मा ओलीले देश बिग्रिएको हेर्न नसकेर कांग्रेस र एमाले मिल्ने निर्णय भएको बताएका छन् । एमाले र कांग्रेसले काँध थाप्दा पनि अघिल्लो सरकारले लय समाउन नसकेको उनले बताए । आइतबारको प्रतिनिधिसभा बैठकमा विश्वासको मत माग्दै उनले प्रचण्ड सरकारले थिति बसाल्न नसकेपछि नयाँ सरकार बनाइएको बताए ।

उनले आफू नेतृत्वको सरकारको ५ प्राथमिकता रहेको बताए । उनले थालेको काम पूरा गर्ने, काम गर्ने क्षमता अभिवृद्धि गर्ने, मूल्यांकन प्रणाली बलियो बनाउने, नीतिगत सुधार गर्ने र निर्माण व्यवसायीको भुक्तानी समयमा नै दिने आफ्नो सरकारको प्राथमिकता भएको सुनाए । यो सरकार काम भइरहेको छ भन्न होइन थालेको काम सकियो भन्ने सुनाउन आतुर रहेको बताए । ’

ओलीले विकास आयोजनामा काम भइरहेको देखिने तर कहिल्यै नसकिने देखिएको भन्दै यस्ता आयोजनालाई समेत राष्ट्रिय गौरवमा राखिएको भन्दै आश्चर्य व्यक्त गरे । उनले भने, ‘नेपाली कांग्रेस र नेकपा एमाले जस्ता बलिया पार्टीले पटक–पटक काँध थाप्दा पनि अघिल्लो सरकारले लय समातेन । सरकारले थिति बसाल्न सकेन । थिति बसाल्ने रुची पनि राखेन । जसको कारण समाजमा अनेकन दुषित परिणाम निस्कने खतरा बढ्यो । त्यसलाई हामीले टुलुटुल हेरर बस्न सकेनौँ । यही कुरालाई आत्मसात गरी पुरानो सरकारको ठाउँमा यो नयाँ सरकार बनाएका हौँ ।’  

ओलीले एमाले र कांग्रेस प्रतिस्पर्धी पार्टी भएको बताए । तर, खास समयमा दुई पार्टीबीच सहकार्य भएको र देशलाई परिणाम पनि दिएको जिकिर गरे । ओलीले साँतबुदे सहमति गरी फेरि सहकार्यको थालनी गरेको बताए । प्रधानमन्त्री केपी शर्मा ओलीले संविधान संशोधनलाई पश्चगमनको संज्ञा दिएको भन्दै आपत्ति जनाएका छन् ।

आइतबार प्रतिनिधिसभा बैठकमा विश्वासको मत माग्दै उनले जसले जीवन बलिदान गरेर हिंसालाई सही बाटोमा ल्याउँदै तानाशाह फ्याँक्यो तिनै पार्टीले कसरी संविधान सिध्याउँछन् ? भन्दै प्रश्न गरे । उनले नेपालमा लोकतन्त्र ल्याउने पार्टीले संविधान कसरी खान्छ ? भन्दै थप प्रश्न गरे । उनले नेपाली कांग्रेस र नेकपा (एमाले)ले संविधान खाने भए कसले बचाइदिन्छ ? भन्ने प्रश्न पनि गरे ।

उनले भने, ‘संविधान संशोधन गर्नु पश्चगमन भनेको सुनेको छु । लोकतन्त्र शब्द कसले सुनायो नेपालमा ? कांग्रेस–कम्युनिस्टले होला नि । यी नै पार्टी संविधान खाने भए, पञ्चायतकालामा जनमतसंग्रहको बेला बच्चाबच्ची रोयो भने ‘ए नबोल नबोल, जनमतसंग्रह भाँडिन्छ’ भनेर अल्मलाउने चलन थियो, ‘चुप लाग चुप लाग’ भन्थे । यो त यस्तै भयो ।’