दुई ठूला दल मिलेर बनाएको सरकारले पनि उस्तै गल्ती गर्यो भने देश कोल्याप्स हुन्छः कोइराला

६ साउन, काठमाडौं । नेपाली कांग्रेसका वरिष्ठ नेता डा शेखर कोइरालाले अहिलेको सरकार पनि असफल भयो भने देश कोल्याप्सको बाटोमा जाने चिन्ता देखाएका छन् । उनले कांग्रेस र एमाले मिलेर बनाएको सरकार असफल भयो, फेरी उस्तै गल्ती दोहोरिए भने जनातामा जाने बाटो बन्द हुने बताएका छन् ।  दुई ठूला दललाई अब गल्ती गर्ने छुट नभएको उनको भनाइ छ । 

अब जनताले सुशासनको अनुभुती हुने गरि सरकारले काम गर्नुपर्ने उनले बताए । अहिलेको गठबन्धनले सुशासन र राजनीतिक स्थायित्व दिन्छ भन्ने सन्देश दिएकाले यसप्रति कांग्रेस र एमालेका नेता पनि सचेत हुनुपर्नेमा उनले बताए । देशको अहिलेको परिस्थिति अत्यन्तै खराब रहेको बताउँदै कोइरालाले भने, अब पनि दुई ठुला दलले गल्ती गरे र जनताको भावना बुझ्न सकेनन् भने देश नै कोल्याप्स हुनसक्छ ।

आफ्नो पार्टी सरकारमा छ त्यसैले उनीहरुले गरेका सबै काम ठिक छ भनेर चुप लागेर नबस्न नहुने उनको तर्क थियो । यदि मन्त्रीहरूले गलत काम गरे तिनको आलोचना र विरोध गर्न कार्यकर्तालाई आग्रह समेत गरे । उनले जनभावना बिरोधि काम गर्ने छुट प्रधानमन्त्री र मन्त्रीलाई नभएको बताए । 

वीपी कोइरालाको ४२औँ स्मृति दिवसको अवसरमा वीपी स्मृति सामुदायिक सहकारी अस्पतालले काठमाडौंमा आयोजना गरेको स्मृति सभालाई सम्बोधन गर्दै कांग्रेस नेता कोइराला वीपी कोइरालाको सिद्धान्त अनुसार कांग्रेसका नेता एवं कार्यकर्ता हिड्न नसकेको बताए । 

उनले भने, ‘हिजो पश्चिमको साथीलाई चोट लाग्दा पुर्वको साथीलाई दुख्थ्यो । पुर्वको साथीको पिडाले पश्चिमको साथीलाई पोल्थ्यो, हामी आफुलाई वीपीका अनुयायी भन्छौं तर स्वार्थमा परेर आफू–आफुमै लड्छौं । वीपीले त यस्तो कहिल्यै सिकाउँनु भएन । हिजोको त्यो आत्मियता कहाँ गयो ?।’