पूर्वराज्यमन्त्री रायको हत्या प्रकरणमा कामदार नियन्त्रणमा, सँगै सुतेका तीन जना अझै फरार

७ साउन, सर्लाही । पूर्व राज्यमन्त्री रामचन्द्र रायको हत्या प्रकरणमा उनकै घरमा काम गर्ने एक जनालाई प्रहरीले नियन्त्रणमा लिइएको छ । उनलाई सोधपुछका लागि नियन्त्रणमा लिइएको जिल्ला प्रहरी कार्यालय सर्लाहीका प्रमुख एवं एसपी रविन्द्रबहादुर सिंहले जानकारी दिए । 

सर्लाहीमा पूर्व राज्यमन्त्री रामचन्द्र रायको आइतबार राति हत्या भएको छ । उनको साविक गाउँको घरमै धारिलो हतियार प्रयोग गरी हत्या भएको हो । रगतले लतपतिएको अवस्थामा रायको शव देखेपछि स्थानीयले प्रहरीलाई खबर गरेका थिए । घरमा काम गर्ने रामउजैन रायका अनुसार तीन जना व्यक्ति रायलाई भेट्न राति आएकोमा उनी सँगै सुतेका थिए ।

घरकै छेउको बाँसघारीबाट पूर्वमन्त्री रायमाथि प्रहार भएको उखु काट्ने घरेलु हतियार बरामद भएको छ । मन्त्री रायकै घरमा रहेको सो हतियारबाट उनको हत्या भएको जिल्ला प्रहरी कार्यालयले जनाएको छ । घटनास्थलको अनुसन्धान र फरार भएकाहरू प्रहरीले खोजी गरिरहेको छ ।