लुम्बिनीमा एमाले उपाध्यक्ष पौडेल र महासचिव पोखरेलको टंक्कर, गिरीले नपाउने भए मुख्यमन्त्री

७ साउन, काठमाडौं । लुम्बिनी प्रदेशको मुख्यमन्त्रीमा नेकपा एमाले उपध्यक्ष विष्णु पौडेल र महासचिव शंकर पोखरेलबीच टक्कर परेको छ । मुख्यमन्त्रीको मुख्य दाबेदार मानिएका लिला गिरी अहिले संसदीय दलका नेता छन् । उनी पार्टी उपाध्यक्ष तथा संघीय अर्थमन्त्री विष्णु पौडेल निकट मानिन्छन् । तर, एमालेले मुख्यमन्त्रीमा चेतनारायण आचार्यलाई अघि सारेको छ । उनी पोखरेल पक्षका हुन् ।  

यसअघि एमाले संसदीय दलका नेता गिरी मुख्यमन्त्री बन्ने पक्कापक्कीजस्तै भए पनि अहिलेले महासचिव पोखरेलको दवावमा केन्द्रले आचार्यलाई अघि बढाइएको छ । पौडेल निकट गिरीलाई अचानक पछाडि पार्दै आचार्य मुख्यमन्त्री बन्नुका पछाडि केन्द्रको चासो र निर्देशनले काम गरेको निकटस्थ नेताहरुको भनाइ छ ।  

पोखरेलको बलमा एमालेबाट लुम्बिनी सरकारको नेतृत्व संसदीय दलका उपनेता आचार्यले गर्ने भएका छन् । एमाले र कांग्रेसले आचार्यलाई मुख्यमन्त्री बनाउने गरि दाबि पेश गर्ने तयारी गरेका छन् ।

आचार्य यसअघि शंकर पोखरेल नेतृत्वको सरकारमा आन्तरिक मामिला तथा कानुन मन्त्री रहेका थिए । एमालेका केन्द्रीय सदस्य समेत रहेका आचार्य अर्घाखाँचीको निर्वाचन क्षेत्र नम्बर १ (१) बाट निर्वाचित सांसद हुन् ।