लुम्बिनीको मुख्यमन्त्रीमा एमालेका आचार्यले पेश गरे दाबी

७ साउन, बुटवल । लुम्बिनीको मुख्यमन्त्रीमा एमाले लुम्बिनी प्रदेश संसदीय दलका उपनेता चेतनारायण आचार्यले दाबी पेस गरेका छन् । नेकपा एमाले र नेपाली कांग्रेसका बीचमा एमालेको नेतृत्वमा प्रदेश सरकार बनाउने गरी भएको सहमति बमोजिम लुम्बिनी प्रदेशमा मुख्यमन्त्रीमा उनको दाबी पेस भएको हो ।  

मुख्यमन्त्री जोखबहादुर महराले आइतबार राजीनामा बुझाएसँगै प्रदेश प्रमुख शेरचनले संविधानको धारा १६८ को उपधारा २ बमोजिमको नयाँ सरकार गठनका लागि आज सोमबार साँझ ६ बजे सम्मको समय सीमा दिएर आह्वान गरेका थिए । ८७ सांसद रहेको लुम्बिनी प्रदेशमा सबैभन्दा ठूलो दलको रूपमा रहेको एमालेसँग २९ जना सांसद छन् । कांग्रेसका २७ जना सांसद छन् । 

लुम्बिनी प्रदेशमा १० वटा दल र १ जना स्वतन्त्र सांसदको प्रतिनिधित्व छ । सरकार गठन गर्न ४४ जना सांसदको समर्थन आवश्यक पर्छ । कांग्रेस र एमाले दुई दल मिल्दा मात्रै पनि लुम्बिनी प्रदेश सरकार बनाउन पर्याप्त बहुमत पुग्छ ।