आयात र निर्यात दुवै खुम्चिएः १७ खर्ब ४५ अर्ब ३६ करोड बराबरको व्यापार, इन्धनमा गयो ३ खर्ब ३७ अर्ब

७ साउन, काठमाडौं । भन्सार विभागले गत आर्थिक बर्षमा १४ खर्ब ४० अर्ब ६० करोड व्यापार घाटा देखाएको छ । तथ्यांक अनुसार व्यापार घाटा अघिल्लो आर्थिक वर्षको तुलनामा ०.९६ प्रतिशतले घटेको छ । भन्सार विभागको आँकडा अनुसार एक वर्षमा आयात र निर्यात दुवै खुम्चिएको छ । जसले गर्दा यो आवमा भित्रिएको रेमिट्यान्सले व्यापार घाटा थेग्ने अवस्था बनेको छ ।

अघिल्लो आर्थिक बर्षको अन्त्यसम्ममा व्यापार घाटा १४ खर्ब ५४ अर्ब ५९ करोड १० लाख रहेको थियो । वैदेशीक व्यापारमा गिरावट आउँदा व्यापार घाटा समेत बढेको हो । गत आर्थिक बर्षमा आयात र निर्यात दुवै घटेको छ । आयात १.१६ र निर्यात ३.०३ प्रतिशतले घटेको हो । गत आवमा १५ खर्ब ९२ अर्ब ९८ करोड रुपैयाँ बराबरको वस्तु आयात हुँदा निर्यात १ खर्ब ५२ अर्ब ३८ करोडमा सीमित भएको विभागले जनाएको छ ।

भन्सार विभागका अनुसार पछिल्लो एक बर्षमा १७ खर्ब ४५ अर्ब ३६ करोड बराबरको वैदेशिक व्यापार भएको छ । अघिल्लो आवमा १७ खर्ब ६८ अर्ब ८७ करोड बराबरको वैदेशिक व्यापार भएको थियो । कुल वैदेशिक व्यापार १.३३ प्रतिशतले घटेको हो । आयात र निर्यात दुवै घट्दा समग्र वैदेशिक व्यापारको आकार समेत खुम्चिएको छ । 

भन्सार विभागको तथ्यांक अनुसार यस वर्ष कुल वैदेशिक व्यापार १७ खर्ब ४५ अर्ब ३६ करोड बराबर व्यापार भएको छ । यो अघिल्लो आवको तुलनामा १.३३ प्रतिशत कम हो । अघिल्लो वर्ष १७ खर्ब ६८ अर्ब ८७ करोड बराबर व्यापार भएको थियो । यस वर्ष पेट्रोलियम पदार्थ आयातमा मात्र ३ खर्ब ३७ अर्ब ३४ करोड रुपैयाँ विदेशिएको छ । 

पेट्रोलियम आयातमा नेपालको सबैभन्दा ठूलो व्यापार घाटा देखिन्छ । यस आवमा १ खर्ब २५ अर्ब बराबर फलाम तथा स्टिल आयात भएको छ । एक वर्ष अवधिमा २८ अर्ब बराबर तरकारीजन्य वस्तु आयात भएको देखिन्छ । ८५ अर्ब ७४ करोड बराबर सवारीसाधन आयात भएको छ ।