न्यूरोड फुटपाथ विवादबारे काठमाडौं महानगर र स्थानीयबीच सहमति, अध्ययन गर्न कार्यदल गठन

७ साउन, काठमाडौं । काठमाडौँ महानगरपालिका र स्थानीय बीच न्युरोडसहितका अन्य क्षेत्रमा मंसिर २ गतेसम्म फुटपाथ बिस्तार तथा निर्माणसम्बन्धी कुनै काम नगर्ने सहमति भएको छ । सहमतिअनुसार एक कार्यदलले अध्ययन गरेपछि मात्र फुटपाथ विस्तार गर्ने/ नगर्ने निर्णय गरिने भएको छ ।

सुमनराज भण्डारीको संयोजकत्वमा गठित कार्यदलमा २२, २३ र २४ नम्बर वडाका अध्यक्ष र २२ बाट विज्ञ साथै महानगर निर्माण विभागका प्रमुख सुरज शाक्य सदस्य सचिव रहेका छन् । काठमाडौं महानगरका मेयर बालेन शाहसहित बसेको वार्ता टोलीले सहमति गरेको हो ।

योसँगै पछिल्ला केही दिनदेखि अशान्त बनेको न्युरोड क्षेत्र अब शान्त हुने भएको छ । महानगरले न्युरोड सडक साँघुरो बनाएर फुटपाथ विस्तारको काम अगाडि बढाएपछि वडा जनप्रतिनिधिसहित स्थानीयहरू विरोधमा उत्रिएका थिए ।