नारायणी अस्पतालमा ३ महिनादेखि एमआरआई सेवा ठप्प हुँदा सेवाग्राही मर्कामा

७ साउन, वीरगन्ज । वीरगन्जको नारायणी अस्पतालमा विगत ३ महिनादेखि एमआरआई सेवा बन्द हुँदा बिरामीहरू मर्कामा परेका छन् । सञ्चालनमा आएको ५ महिनापनि नबित्दै एमआरआई मेसिनको बाँकी भुक्तानीका विषयमा अस्पताल प्रशासन र आपुर्तिकर्ताबीचको विवादका कारण एमआरआई सेवा ३ महिनादेखि बन्द भएको हो ।

संघ सरकारको स्वास्थ्य मन्त्रालय मातहतको स्वास्थ्य सेवा विभागले टेण्डर आह्वान गरी आपूर्तिकर्ता लुम्बिनी हेल्थ केयर प्रालि मार्फत चीनबाट ३० करोड रुपैयाँमा खरिद गरि ल्याएको थ्रीटेस्लाको एमआरआई मेसिन अस्पतालमा जडान गरि गत कार्तिक महिनादेखि सञ्चालनमा ल्याइएको थियो ।

तर मेशीनको बाँकी २० प्रतिशत रकम अस्पतालले आपूर्तिकर्ता कम्पनी हेल्थ केयर प्रालि लाई भुक्तानी नगरेपछि मेशीन उत्पादक चिनीयाँ कम्पनीले मेशीनको सफ्टवेयर अपडेट 'अद्यावधिक' नगदिएकाले मेशीन गत बैशाखदेखि बन्द हुन पुगेको हो ।

त्यस अघि पनि उक्त एमआरआई मेशीन आपूर्तिकर्ता कम्पनीले २०७९ चैतमै चीनबाट खरिद गरेर ल्याएपनि बजारमा हिलियम ग्याँस नपाइएको भन्दै अस्पतालमा जडान नगरिदिदाँ ८ महिनासम्म त्यसै थन्क्याएर राख्नु परेको थियो । गत गत असोज २३ मा तत्कालीन स्वास्थ्यमन्त्री मोहनबहादुर बस्नेत वीरगन्ज आएका बेला एमआरआई मेशीनको उद्घाटन गरेका थिए । उद्घाटन गरिएको तीन हप्ता पछि मात्रै अर्थात् २०८० कात्तिक १४ गतेदेखि एमआरआई सेवा सुरु गरिएको थियो ।

तर सेवा सुरु भएको ५ महिनापनि नबित्दै मेशीनको बाँकी रकम भुक्तानीको विषयमा आपुर्तिकर्ता कम्पनी र अस्पताल प्रशासन बीचको विवादले गत वैशाखदेखि मेशीन बन्द हुन पुगेको हो । जसको मारमा अस्पतालमा उपचारका लागि आउने बिरामी परेका छन् ।

नारायणी अस्पतालको एमआरआई सेवा ३ महिनादेखि अवरुद्ध हुँदा बिरामीहरू बजारका निजी अस्पतालमा दोब्बर शुल्क तिरेर एमआरआई सेवा लिन बाध्य छन्। नारायणी अस्पतालमा ८ हजार रुपैयाँमा उपलब्ध एमआरआई सेवाका लागि बिरामीले निजी अस्पतालमा १५ देखि १६ हजार रुपैयाँ तिरिरहेका छन्।

नारायणी अस्पतालका निमित्त मेसु डाक्टर एनामुल हकले भने आपूर्तिकर्ता लुम्बिनी हेल्थ केयर प्रालिको बदमाशीका कारण एमआरआई सेवा तीन महिनादेखि बन्द हुन पुगेको बताए ।आपूर्तीकर्ता कम्पनीले मेशीनको सफ्टवेयर अपडेट नगरिदिएको कारण गत वैशाखदेखि नै मेशीन बन्द रहेको उनले बताए । उनले भने,‘ उसलाई तिर्नु पर्ने बाँकी २० प्रतिशत रकम अस्पतालसंग तयारी अवस्थामा छ । तर उसले मेसीन खरिद गरि ल्याए बापतको ५ प्रतिशत कर नेपाल सरकारलाई अहिलेसम्म बुझाएको छैन । त्यही कारण बाँकी २० प्रतिशत रकम अस्पतालले उसलाई भुक्तानी नदिएको हो ।’

आपूर्तिकर्ता कम्पनीले नेपाल सरकारलाई तिर्नुपर्ने कर नतिरी अस्पतालले बाँकी रहेको रकम भुक्तानी गरिदिएमा त्यसको जिम्मेवार आँफु हुने भएकाले बाँकी भुक्तानी नगरेको उनले बताए । निमित्त मेसु हकले भने,‘ उसले सरकारलाई तिर्नुपर्ने कर जुन दिन तिर्छ त्यहि दिन उसलाई तिर्नु पर्ने बाँकी २० प्रतिशत रकम अस्पतालले भुक्तानी गरिदिन्छ ।’

सफ्टवेयर अपडेट गरेर मेशीन सुचारु गर्नका लागि अस्पताल प्रशासनले दुई हप्ता पहिले नै आपूर्तिकर्ता लुम्बिनी हेल्थ केयर प्रालिलाई पत्र काटीसकेको उनले जानकारी दिए ।