बागमतीको मुख्यमन्त्रीमा कांग्रेसले दावी पेश गर्दै, लामालाई आजै मुख्यमन्त्री नियुक्ति गर्ने तयारी

८ साउन, हेटौंडा । बागमती प्रदेशसभा, नेपाली कांग्रेस संसदीय दलका नेता बहादुरसिंह लामाले आज मुख्यमन्त्रीमा दावी पेश गर्दैछन् । सोमबार नै मुख्यमन्त्रीमा दावी पेश गर्ने तयारी भएपनि मन्त्रालयमा भागबण्डा नमिल्दा र एमाले भित्र मन्त्री छनौटको आन्तरिक समस्याले गर्दा पूर्वनिर्धारित कार्यक्रम रोकिएको थियो । 

पछि कांग्रेसले मुख्यमन्त्रीसहित ७ र एमालेले ६ वटा मन्त्रालय लिने गरी सहमति भएको छ । योसँगै आज बिहान ११ बजे लामाले मुख्यमन्त्रीमा दाबी पेश गर्ने तयारी रहेको छ ।  प्रदेश प्रमुख यादवचन्द्र शर्माले बहुमतको सरकार गठनका लागि मङ्गलबारसम्मको समय दिएका छन् ।

सोही आह्वान अनुसार लामाले एमालेसहितका दलको समर्थनमा मुख्यमन्त्रीमा दाबी पेश गर्ने र प्रदेश प्रमुख शर्माले आजै साँझ लामालाई मुख्यमन्त्रीमा नियुक्त गर्ने तयारी छ ।