द्वन्द्वकालीन घटनाका पीडितको न्यायका सम्बन्धमा प्रधानमन्त्रीले देखाए चासो

८ साउन, काठमाडौं । द्वन्द्वकालीन घटनाको निरुपण र न्यायका सम्बन्धमा प्रधानमन्त्री केपी शर्मा ओलीले चासो देखाएका छन् । उनले संक्रमणकालीन न्यायसम्बन्धी (टीआरसी) विधेयकमा भइरहेका कामबारे चासो राखेका हुन् । यसअघिको सरकारले यससम्बन्धी विवाद मिलाउन गठन गरेको कार्यदलसँग प्रधानमन्त्री ओलीले छलफल राखेका छन् । 

तत्कालीन प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली र कांग्रेस सभापति शेरबहादुर देउवाबीच सङ्क्रमणकालीन न्यायसँग सम्बन्धित मुद्दा टंगो लगाउन सहमति तीन सदस्यीय  कार्यदल बनाइएको थियो । कार्यदलका सदस्यहरूलाई प्रधानमन्त्री ओलीले बालुवाटार बोलाएका छन् । 

कार्यदलले यसअघिको मस्यौदामा भएका असहमतिका बुँदामा छलफल गरेर साझा धारणा बनाउन एक पटक बैठक पनि बसेको थियो । तर सरकार फेरिएसँगै त्यसबारे छलफल भएको छैन् । टीआरसी विधेयकमा सहमति जुटाउन नेपाली कांग्रेसका नेता रमेश लेखक, एमालेका तत्कालीन प्रमुख सचेतक महेश बर्तौला र माओवादी केन्द्रका नेता जनार्दन शर्मा सदस्य रहेको कार्यदल बनाइएको थियो । 
 
यसमा मेलमिलापको लागि पीडितको स्वतन्त्र सहमति नभएमा के गर्ने भन्ने विषय र घटी सजायका सम्बन्धमा आधार कारण खुलाएर सजाय कम गर्न सकिने व्यवस्था गर्ने वा प्रतिशत नै तोकेर जाने भन्ने विषयबारे दलहरूबिच मतभेद छ । यसबारे जानकारी लिन ओलीले कार्यदलका सदस्यलाई बोलाएका हुन् ।