संविधान संशोधन आवश्यक छ, यसमा लेखिएका कुरा राम्रोसँग पढेर मात्र बहसमा बसौँः कोइराला

८ साउन, काठमाडौं । नेपाली कांग्रेसका वरिष्ठ नेता डा. शेखर कोइरालाले आफूले बनाएको संविधान राम्ररी पढेर मात्र यसको बहसमा आउन नेताहरूलाई सुझाव दिएका छन् । उनले संविधानका  प्रावधानका विषयमा नेताहरूमा अध्ययन कम भएको र अनावश्यक टिप्पणी हुन थालेको बताएका छन् । संविधान यथोचित कुरामा संशोधन हुनुपर्ने उनको तर्क छ ।  
  
नेपाल प्रेस युनियनले काठमाडौंमा आयोजना गरेको कार्यक्रममा कोइरालाले संविधान संशोधनको विपक्षमा रहेका राजनीतिक दलहरूले संविधान राम्रोसँग अध्ययन नगरेको बताए । उनले संविधानमै हरेक १० वर्षमा संविधान संशोधन गर्नुपर्ने उल्लेख गरेको र यो अवधिमा देखिएका कमजोरीलाई सच्याउन भनिएको बताए । संविधान संशोधनका विषयमा संसद्मा पनि दुई थरी धारणा आएको बताए । 

संविधान संशोधन गर्दा समावेशीताको कुरालाई अझ बलियो बनाउने गरी जानुपर्ने र निर्वाचन प्रणालीलाई सुधार गर्नु पर्नेमा उनले जोड दिए । तर संशोधनको नाममा कतै पेन्डोरा बक्स त खुल्ने होइन भन्ने डर भएकाले यसमा सचेत हुनुपर्ने उनको भनाइ थियो । संविधान संशोधन गर्दा समावेशीताको कुरालाई अझ बलियो बनाउनु पर्ने जरूरी रहेको र निर्वाचन प्रणालीलाई पनि सुधार गर्दै संशोधनको गर्नुपपर्ने बताए । 

यसमा मिडिया जगतले पनि सचेत भएर खबरदारी गर्नुपर्ने बताए । उनले भ्रष्टाचार नियन्त्रण र सुशासनको कुरालाई कांग्रेसले गम्भीर भएर ध्यान दिनु पर्ने बताए । ‘देशमा भ्रष्टाचारको सीमा नै नाँघेको छ। त्यसैले यसको नियन्त्रण र सुशासनलाई केन्द्रमा राखेर कांग्रेसले काम गर्नुपर्दछ । 

ठूला दल कांग्रेस–एमाले एक ठाउँमा उभिदा कतै निरंकुशता उब्जन्छ कि भन्न डर भएकाले मिडियाले निरन्तर खबरदारी गर्नु पर्नेमा उनले जोड दिए । सत्ता पक्षमा हुँदैमा गलतलाई सत्य भन्न नसकिने भन्दै उनले संसदबाट सहीलाई सही र गलतलाई गलत हो भन्ने आवाज उठाउने विचार व्यक्त गरे । अहिले मन्त्रीहरु खादा मालामा व्यस्त भएको भन्दै उनले यो सरकारलाई गल्ती गर्ने र कुनै कमी कमजोरी गर्ने छुट नभएको बताए ।

उनले नेपाली कांग्रेस र नेकपा एमालेमिलेर बनेको सरकारको निगरानी गर्नुपर्ने बताए । सरकारको प्राथमिकतामा संविधान संशोधन, सुशासन र भ्रष्टाचार नियन्त्रण परेको भन्दै राजनीतिक स्थायित्वका लागि निर्वाचन प्रणालीमा पुनर्विचार गर्नुपर्ने उनको भनाइ छ । देशमा प्रधानमन्त्री परिवर्तन भइरहेको तर  पोलीसी परिवर्तन हुन नसकेको बताए ।   

उनले भने, ‘यो सरकार बनाउनुपूर्व निर्वाचन भयो, निर्वाचन हुँदा कांग्रेस र माओवादी एक ठाउँमा थियो । सरकार माओवादी र एमालेको बन्यो । त्यसपछि कांग्रेस र माओवादीको बन्यो । फेरि माओवादी र एमालेको बन्यो । प्रधानमन्त्री उही हुनुहुन्छ । पोलिसी चेन्ज भइरहेको छ । अनि देश कसरी अघि बढ्छ । दुई ठूला दल एक ठाउँमा उभिँदा निरंकुशता जन्मिन सक्छ । हामी सचेत हुनुपर्छ ।’