पूर्वमन्त्रीले छोराको प्रमाणपत्र लिन ५ हजार घुस दिएको विषयमा छानबिन गर्न शिक्षाले बनायो समिति

८ साउन, काठमाडौं । शिक्षा, विज्ञान तथा प्रविधि मन्त्रालयले एक पूर्वमन्त्रीले छोराको प्रमाणपत्र लिन ५ हाजार घुस दिएको विषयमा छानविन गर्न समिति गठन गरेको छ । पाठ्यक्रम विकास केन्द्रबाट सेवा लिँदा घुस खुवाउनु परेको सांसदको आरोपपछि शिक्षा मन्त्रालयले छानबिन समिति गठन गरेको हो । 

शिक्षा तथा मानव स्रोत विकास केन्द्रका प्रवक्ता तथा उपमहानिर्देशक बसन्त प्रसाद कोइरालाको संयोजकत्वमा तीन सदस्यीय छानबिन समिति गठन भएको छ । मन्त्रालयका अनुसार समितिमा उपसचिव रामप्रसाद शर्मा र शाखा अधिकृत पुष्पा वाग्ले सदस्य छन् । मन्त्रीस्तरीय निर्णयबाट छानबिन समिति बनाइएको हो । 

पूर्वमन्त्री एवं जनता समाजवादीका सांसद वीरेन्द्र महतो प्रतिनिधिसभा बैठकमै छोराको समकक्षता लिन पाँच हजार रुपैयाँ घुस दिनुपरेको बताएका थिए । भारतीय सीबीएसई कोर्स पढेर नेपालबाट समकक्षता लिँदा ५ हजार घुस दिएपछि मात्रै काम बनेको भन्दै संसदमा प्रश्न उठाएका थिए ।