लुम्बिनीका मुख्यमन्त्री आचार्यको शपथ ग्रहण आज, को-को बन्दैछन् मन्त्री ?

९ साउन, रुपन्देही । लुम्बिनी प्रदेशका नवनियुक्त मुख्यमन्त्री चेतनारायण आचार्यले आज पद तथा गोपनीयताको सपथ लिँदै छन् । एमाले कांग्रेसका ५६ सांसदको समर्थनमा आइतबार एमालेका आचार्य मुख्यमन्त्री बनेका हुन् ।

उनले सपथसँगै मन्त्रिपरिषद् विस्तार गर्ने तयारी छ । सरकारमा सहभागी हुन एमालेले ४ मन्त्रीको नाम टुंगो लाएको छ । जस अनुसार रुपन्देहीका भूमिश्वर ढकाल, गुल्मीका दिनेश पन्थी, पाल्पाका खेमबहादुर सारु मगर र दाङकी सीता शर्मा चौधरी मन्त्री बन्ने भएका छन् ।

त्यसैगरी कांग्रेसले ५ मन्त्रीको नाम टुंगो लगाएको छ । मंगलबार राति कांग्रेसले बर्दियाका जन्मजय तिमिल्सिना, गुल्मीका धनेन्द्र कार्की, प्यूठानका रोज राणा, दाङका प्रचण्डविक्रम न्यौपाने, बाँकेका बादशाह कुर्मीलाई मन्त्री बनाउने निर्णय गरेको कांग्रेस लुम्बिनीका एक पदाधिकारीले जनाएका छन् ।

दुवै दलले मन्त्री छान्न ढिलाई गरेकाले आज बिनाविभागीय रुपमा शपथ लिने र बिहीबार मन्त्रालयको जिम्मेवारी दिने जनाइएको छ । कांग्रेसबाट अहिले मन्त्री बनाइएका मध्ये रोज राणा मात्रै यसअघि मन्त्री बनेका हुन् अरु सबै नयाँ हुन् ।