मुख्यमन्त्री नपाएपछि एमाले लुम्बिनी संसदीय दलको नेताबाट गिरीले दिए राजीनामा

९ साउन, बुटवल । मुख्यमन्त्री  नपाएपछि नेकपा एमाले लुम्बिनी संसदीय दलका नेता लिला गिरीले राजीनामा दिएका छन् । गिरीले दलको नेता पदबाट राजीनामा दिएका हुन् । उनी मुख्यमन्त्री बन्ने तयारीमा थिए । तर, अन्त्यमा आएर केन्द्रबाट चेतनारायण आचार्यलाई मुख्यमन्त्री बनाउने निर्णय भयो ।   

गिरीले दिएको राजीनामा पत्र पार्टी अध्यक्ष केपी शर्मा ओलीलाई पठाएका छन् । लुम्बिनी प्रदेशमा कांग्रेस एमालेको गठबन्धनमा सरकारले  संसदीय दलको नेताको हैसियतले गिरीले मुख्यमन्त्री पाउनुपर्ने थियो । तर, महासचिव शंकर पोखरेलले हस्तक्षेप गरेर उप नेता चेतनारायण आचार्यले मुख्य मन्त्री बनाए । 

सोमबार बिहान मुख्यमन्त्रीमा दावी पेश गर्न जान पत्र तयार हुँदै गर्दा महासचिव पोखरेलले प्रदेश अध्यक्ष राधाकृष्ण कंडेललाई फोन गर्दै गिरीको साटो आचार्यलाई मुख्यमन्त्री बनाउने निर्णय भएको जानकारी गराएपछि गिरीले आफूमाथि घात भएको बताएका थिए ।
 
मुख्यमन्त्री नियुक्तिका सन्दर्भमा संसदीय विधि, पद्धति भन्दा बाहिर गएर निर्णय भएको भन्दै गिरीले राजीनामा दिएका हुन् । मुख्यमन्त्री आचार्यले आज मन्त्रिपरिषद समेत गठन गरेका छन् । महासचिव पोखरेलको जोडबलमा उपनेता चेतनारायण आचार्यलाई मुख्यमन्त्री नियुक्त गरेपछि गिरी रुष्ट छन् ।