बुधबार पनि आयो दोलखा भीमसेनको शिलामा पसिना, अनिष्ट हुने मान्यता

९ साउन, दोलखा । बुधबार पनि दोलखा भीमसेनलाई पसिना आएको छ । मध्यान्ह १२.४५ बजेदेखि शिलाको दायाँ भागबाट निरन्तर पसिना बगिरहेको हो। दिउँसो १२.४५ मा पुजारी काशीनारायण श्रेष्ठले शिला एक्कासि कालो र चम्किलो भए सँगै तप तप पसिना बग्न थालेको देखेपछि गुठियार र पूजा व्यवस्थापन समितिका पदाधिकारीलाई खबर गरेका थिए।मन्दिरका पुजारीले बताएका छन् ।

पुजारीहरूले भीमसेनलाई पसिना आएको खबर गरेपछि स्थानीयहरू उपस्थित भएका थिए । साउन ५ मा पनि दिउँसो करिब १ बजे ४७ मिनेटदेखि भीमसेनको शिलामा पसिना आएको थियो । 

भीमेश्वर गुठी तथा पूजा व्यवस्थापन समितिका अनुसार शिलाको बाँयापट्टी निरन्तर पसिना आइरहेको छ । शिलामा पसिना आउँदा मुलुकमा ठूलो अनिष्ट हुने विश्वास गरिँदै आएको छ भने शिलालाई साक्षात् भविष्य सूचक मानिँदै आएको छ । शिलामा आएको पसिना कपासले पुस्ने र खाममा हालेर राष्ट्रपति सामु पुर्याउने चलन छ ।

पसिना आएपछि स्थानीयहरू घण्ट, शंख र नगराहरु बजाएर लगातार पूजा गर्दै आएका थिए । पसिना आएपछि मूर्तिको रङ समेत फेरिएर स्थानीय बताउँछन् । विसं. १९९० सालको भुकम्प र २०६२÷६३ को जनआन्दोलनका बेला पनि दोलखा भीमसेनलाई पसिना आएको थियो । राजतन्त्र हुँदा दोलखा भीमसेनलाई पसिना आएमा राजा आफैं मन्दिरमा पुगेर पूजाअर्चना गर्ने चलन थियो ।

यसरी लगातार पसिना आउनु राम्रो संकेत नभएको पुजारी बताउँछन् । आज सौर्य एयरलाइन्सको जहाज दुर्घटना हुँदा १८ जनाको मृत्यु भएको छ । साउन ५ गते पसिना आएपछि राष्ट्र प्रमुखको रुपमा रहेको राष्ट्रपति कार्यालयमा पसिना पठाइएको थियो । सरकार भने भीमसेनको शिलामा पसिना आउँदा खासै चासो दिने गरेको छैन ।