आगलागीपछि दक्षिणी इटालीमा एक हजार पर्यटकलाई सारियो सुरक्षित स्थान

९ साउन, काठमाडौं । इटालीको दक्षिणी क्षेत्र पुगलियामा लागेको डढेलोपछि करिब एक हजार पर्यटकलाई सुरक्षित स्थानमा सारिएको अग्निनियन्त्रकहरूले बताएका छन् ।

इटालीको गार्गानो उप–क्षेत्रको जङ्गली तटीय क्षेत्रमा आगो निभाउन तीन क्यानेडाएर पानीवर्षक र एक हेलिकप्टर खटाइएको थियो ।

“जमिन र हावाबाट आगोलाई नियन्त्रणमा लिइएको छ”, फायर सर्भिसका प्रवक्ताले करिब एक हजार पर्यटकलाई बाहिर निकालिएको पुष्टि गर्दै एएफपीलाई बताए ।

पुगलियाले आफ्नो सफा पानी, सेतो बलौटे समुद्र तट र विशिष्ट वास्तुकलाका साथ विश्वभरका पर्यटकहरूलाई आकर्षित गर्दछ । आगोले प्रभावित क्षेत्रमा गार्गानो राष्ट्रिय निकुञ्जको प्रभुत्व रहेको छ ।

गत हप्ता पुगलियाको छिमेकी बासिलिकाटाको माटेरा नजिकै आगो निभाउने क्रममा दुई अग्निनियन्त्रकको मृत्यु भएको थियो ।