सशस्त्रमा दुई डीआईजीमा लागि ६ एससएपी प्रतिस्पर्धी

१० साउन, काठमाडौं । सशस्त्र प्रहरीमा रिक्त हुन लागेका दुई डीआईजी पदमा ६ जनाले दावी शुरु गरेका छन् । नेपाली कांग्रेसले गृह मन्त्रालय लिने बित्तिकै आफूलाई कांग्रेस रहको भन्दै सशस्त्र प्रहरीका ६ जना एसएसपीले डीआईजीको दावी गरेका हुन् । एसएसपीहरु कृष्ण ढकाल, मनिष थापा, कृष्णराज पाठक, प्रवीण कँडेल, विनोद श्रेष्ठ, दीपेन्द्र कुँवरले लबिङ शुरु गरेका हुन् । सशस्त्र भित्र राष्ट्रिय ज्वाईको उपनामबाट चर्चामा रहेका कुँवरकै अनुकूल गृहमन्त्रालय रहेकाे यसपटक उनको बढुवामा कसैले रोक्नसक्ने अवस्था नरहेको र बाँकी एक पदका लागि पाँच जनाको प्रतिस्पर्धा रहेको बताइएकाे छ ।

भदौको पहिलो साता लुम्बिनी प्रदेशका ५ नम्बर वाहिनीपति अभि खत्री र सुर्खेतस्थित ६ नं बाहिनीपति दुर्गा भट्टराई अवकाशमा जाने भएका छन् । त्यसका लागि सशस्त्र भित्र अहिलेबाटै लबिङ शुरु भएको हो । ढकाल, थापा र पाठक यसअघि पनि डीआईजी हुने सूचीबाट बाहिरिएका थिए । प्रतिस्पर्धी भएपनि उनीहरू छुटेका हुन् । यसपटक स्वाभाविक बढुवा हुने हो भने यी तीन मध्ये दुई बढुवा हुनेछन् । तर यसपल्ट यस्तो अवस्था छैन । यसअघि नै बढुवा हुनुपर्ने भन्दै कम्मर कसेर लागेका कुँवरले छाड्ने स्थिति छैन । उनी संगठनभित्र आईजीपी राजु अर्याल, एआईजी नारायण दत्त पौडेल र वंशी दाहालसँग राम्रो सम्बन्ध बनाएर बसेका छन् ।

त्यति मात्र होइन, पूर्व प्रधानमन्त्री शेरबहादुर देउवाका स्वकीय सचिव भानु देउवाका आफ्नै बहिनी ज्वाई भएकै कारण सशस्त्रमा बारम्बार अनुचित लाभ लिँदै आएकाले अहिले यो मौका उनले चुकाउने अवस्था देखिँदैन । यसअघिको सरकारमा चुपचाप रहेका कुँवर अहिले विस्तारै चहलपहल बढाउन थालेका छन् । ‘मलाई खास डर छैन, मेरो बारेमा जे जति समाचार आउनु थियो, त्यो सबै आइसक्यो, शक्तिमा हुँदा जसले पनि गर्ने हुन्’, उनले आफू निकट रहेका प्रहरी कर्मचारीलाई उनले भन्दै आएका छन् ।

सशस्त्र प्रहरीले राजनीतिक भेटघाट र कूटनीतिक भेटघाटलाई कस्दै लगेको भएपनि उनका हकमा भने यो लागु हुँदैन । ‘ओपन सेक्रेट जस्तै छ, कुँवर शक्तिकै आडमा यो अवस्थामा आइपुगेका हुन् अहिले पनि उनको बढुवा कसैले पनि रोक्ने सक्दैनन्, प्रधानमन्त्री मात्रै हो उनको बढुवा रोक्ने’, सशस्त्र मुख्यालयका एक अधिकारीले भने । बेसिकमा ६६ नम्बरमा रहेका कुँवर अहिले उनको व्याचको एक नम्बरको एसएसपी हुन् । सशस्त्र प्रहरी नियमावली, उनकै बढुवाका लागि यसअघि २०७२ नै संशोधन गरेर पहिलो नम्बरमा वरिष्ठ उपरीक्षक (एसएसपी) बढुवामा सिफारिस गरिएको थियो ।  

२०७९ असार २३ गते सशस्त्र प्रहरी नियमावली संशोधन हुनुअघिसम्म एसपी भएको ४ वर्ष पूरा भएपछि बल्ल एसएसपी बढुवाका लागि योग्य हुने प्रावधान थियो । पछि यो प्रावधान कुँवरलाई बढुवा गर्नुपरे पछि संशोधन गर्दै ३ वर्षमा झारियो । यसले पनि के देखाउँछ भने उनी आफ्नो हकमा नियमावली नै संशोधन गराउन सक्ने हैसियत राख्छन् ।

चार वर्षे प्रावधानअनुसार २०७९ वैशाख २६ गते नै सि सं. १ का दीपेन्द्र शाह, सुरेशकुमार श्रेष्ठ, पुरुषोत्तम थापा, अन्जनीकुमार पोख्रेल, दीपक अधिकारीलगायत एसएसपी बढुवाका लागि योग्य भइसकेका थिए । सोही अनुसार उनीहरुको बढुवा अघि बढ्नु पर्नेमा केही समय रोकिएका थियो । यो रोकिनुको पछाडि उनै कुँवरको बढुवा जोडिएको थियो ।