बेचन झाको बन्दी प्रत्यक्षीकरण निवेदन न्यायाधीश ढुंगानाको इजलासमा, सुनुवाइ हुँदै

१० साउन, काठमाडौं । थुनामुक्त हुन सर्वोच्च अदालतमा बन्दी प्रत्यक्षीकरण निवेदन दिएका  बेचन झाको रिटमा पेशी तोकिएको छ । नक्कली भुटानी शरणार्थी प्रकरणमा पक्राउ परि अनुसन्धानका लागि उनी थुनामा छन् । उनको बन्दी प्रत्यक्षीकरण निवेदन न्यायाधीश टेकप्रसाद ढुंगानाको इजलासमा पेशी तोकिएको छ ।

यो निवेदन दोस्रो नम्बरमा पेशी रहेकाले आजै फैसला हुने सम्भावना छ । जिल्ला अदालत काठमाडौंले संगठित अपराधमा अनुसन्धानका लागि पटक–पटक म्याद थप गरेर थुनामा राखेपछि झाका तर्फबाट छोरा दिब्यान्सु शेखर झाले २०८१ असार ३० गते बन्दी प्रत्यक्षीकरणको निवेदन दर्ता गराएका थिए ।

उक्त निवेदनमा दुई पटकसम्म पेशी तोकिए पनि झा पक्षले निवेदन दिएर सार्दै आएको छ । नक्कली भुटानी शरणार्थी प्रकरणमा दोस्रो चरणमा पूरक अभियोग पत्र दायर गर्न  जिल्ला प्रहरी परिसर काठमाडौंले अनुसन्धान गरिरहेको छ । जिल्ला अदालतले उनलाई अनुसन्धानका लागि थुनामा पठाएको हो ।