आर्थिक सल्लाहकार खतिवडासँग मन्थनपछि भोलि मौद्रिक नीति सार्वजनिक गर्ने तयारीमा राष्ट्र बैंक

१० साउन, काठमाडौं । प्रधानमन्त्रीका आर्थिक सल्लाहकार डा.युवराज खतिवडाले अध्ययन गर्न भन्दै रोकेको मौद्रिक नीति भोलि शुक्रबार सार्वजनिक गर्ने तयारीमा राष्ट्र बैंक पुगेको छ । राष्ट्र बैंक उच्च स्रोतका अनुसार शुक्रबार बिहान सञ्चालक समितिको बैठकले मौद्रिक नीति पारित गर्ने तयारी छ । 
 
नेपाल राष्ट्र बैंकले गएको शुक्रबार नै आर्थिक वर्ष २०८१/८२ को मौद्रिक नीति सार्वजनिक गर्ने तयारी गरेको थियो । तर, प्रधानमन्त्रीको कार्यालयबाट रोकिएको थियो । राष्ट्र बैंकले तयारी पूरा गरेर मौद्रिक नीति सार्वजनिक गर्ने योजना साथ गत शुक्रबार बिहान ८ बजे सञ्चालक समितिको बैठक पनि बोलाएको थियो, तर मौद्रिक नीति आएन । यो किन रोकियो र अब कहिले आउँछ भन्नेमा राष्ट्र बैंकले नै जवाफ दिन सकिरहेको थिएन ।

प्रधानमन्त्री तथा मन्त्रिपरिषद् कार्यालय र अर्थ मन्त्रालयले पनि कुनै हस्तक्षेप नभएको बताएका थिए । राष्ट्र बैंक स्रोतका अनुसार अन्तिम समयमा प्रधानमन्त्री कार्यालयबाट मौद्रिक नीति रोक्न निर्देशन आएको थियो । त्यसपछि रोकिएको हो । प्रधानमन्त्री ओलीले खतिवडालाई आर्थिक सल्लाहकारमा नियुक्त गरेपछि उनले मौद्रिक नीति अध्ययन गर्न बताएका थिए । यसपछि गभर्नर महाप्रसाद अधिकारीलाई केही दिन रोक्न भनिएको थियो । 

कार्यविधिमा आर्थिक वर्ष सकिएको १५ दिनभित्र मौद्रिक नीति ल्याउनुपर्छ । कुन दिन आउँछ, भन्न सकिने अवस्था छैन, शुक्रबार सञ्चालक समितिको बैठक बोलाइएकाले भोलि नै आउन सक्छ, स्रोतले भन्यो ।  राष्ट्र बैंकले प्रायः साउन पहिलो साता नै मौद्रिक नीति ल्याउने गरेको थियो । आर्थिक वर्ष ०८०/८१ मा साउन ७ मा र ०७९÷८० मा साउन ६ मा मौद्रिक नीति सार्वजनिक गरिएको थियो । 

अहिले समष्टिगत आर्थिक स्थायित्व कायम गर्न तरलता व्यवस्थापन गर्दै कर्जा प्रवाह र ब्याजदरलाई प्रवाहित गर्ने काम मौद्रिक नीतिले गरेको छ । मौद्रिक नीतिले अर्थतन्त्रमा आवश्यक मात्रामा तरलता वा मुद्राको मात्राको उपलब्धता सुनिश्चित गरी समष्टिगत आर्थिक स्थिरता कायम गर्न भूमिका खेल्ने भएकाले पनि सबैले यसमा चासो राखेका हुन् । नेपाल राष्ट्र बैंक ऐन, २०५८ मा नेपाल राष्ट्र बैंकले वार्षिक रूपमा मौद्रिक नीति तर्जुमा गरेर सार्वजनिक गर्नुपर्ने व्यवस्था गरेपछि राष्ट्र बैंकले वार्षिक रूपमा मौद्रिक नीति तर्जुमा गर्दै आएको छ ।