५२ मुलुकबाट ६४ अर्ब २४ करोड आयो एफडीआई, चीनबाट झण्डै २४ अर्बको प्रतिबद्धता

१० साउन, काठमाडौं । गत आर्थिक वर्ष ६४ अर्ब २४ करोड ३० लाख बराबर  प्रत्यक्ष विदेशी लगानी (एफडीआइ) प्रतिबद्धता आएको छ । वैशाखमा तेस्रो लगानी सम्मेलन भएकै कारण प्रतिबद्धता बढेको उद्योग विभागको भनाइ छ । वैशाखमा १३ अर्ब ४४ करोड र जेठमा ११ अर्ब २९ करोड लगानी प्रतिबद्धता आएको छ । साउनमा ११ अर्ब ९३ करोड लगानी प्रतिबद्धता आएको थियो । 

गत आर्थिक वर्षको ११ महिनामा ८ अर्ब २२ करोड रुपैयाँ लगानी भित्रिएको छ । विभागका अनुसार सबैभन्दा बढी चीनबाट २३ अर्ब ९१ करोड ६७ लाख रुपैयाँ लगानी प्रतिबद्धता आएको छ । टर्की, नर्वे, इटाली, डेनमार्क, पाकिस्ता, आयरल्याण्डलगायत २१ मुलुकबाट प्रति मुलुक २ करोड लगानी प्रतिबद्धता आएको विभागको भनाइ छ ।  यसअघि आर्थिक वर्ष ०७१÷०७२ मा ६७ अर्ब ४५ करोड लगानी प्रतिबद्धता आएको थियो ।

त्यसयता गत आर्थिक वर्ष सबैभन्दा बढी ६४ अर्ब २४ करोड रुपैयाँ लगानी प्रतिबद्धता आएको विभागले जनाएको छ । आर्थिक वर्ष ०७१÷०७२ मा लगानी प्रतिबद्धता भए पनि उक्त वर्ष ४ अर्ब ३८ करोड मात्रै लगानी भित्रिएको छ । विदेशी लगानी प्रतिबद्धता बढे पनि भित्रिने रकम न्यून रहेको छ । सरकारले विदेशी लगानी स्वीकृत गर्दा लगानीकर्तालाई चरणबद्ध रूपमा भित्र्याउने अनुमति दिने गरेको छ ।

गत आर्थिक वर्ष नेपालमा खुद ५ अर्ब ९६ करोड १३ लाख मात्र एफडीआई भित्रिएको छ । कुल ७ अर्ब ७६ करोड ८६ लाख रुपैयाँ विदेशी लगानी भित्रिए पनि १ अर्ब ८० करोड ७३ लाख बराबर पुरानो लगानी बाहिरिएकाले खुद विदेशी लगानी ५ अर्ब ९६ करोड १३ लाख देखिएको छ ।