पूर्वाधारको वित्तीय प्रगति ८० प्रतिशत : डेढ दर्जन सडक, आधा दर्जन पुल र झोलुङ्गे पुल निर्माण

•प्रकाश डोटेल

१० साउन, स्याङ्जा । पूर्वाधार विकास कार्यालय स्याङजाको वित्तीय प्रगति ८० प्रतिशत रहेको छ । आर्थिक वर्ष २०८०/०८१ को कुल बजेट एक अर्ब ३७ करोड ८२ लाख ९४ हजार मध्ये एक अर्ब ११ करोड ६ लाख ७७ हजार खर्च गर्दा ८० प्रतिशत वित्तीय प्रगति भएको हो ।

सडक निर्माण तर्फ विनियोजित एक अर्ब २६ करोड ५३ लाख ७७ हजारमा एक अर्ब एक करोड ९४ लाख खर्च गर्दा ८० प्रतिशत र पुल तर्फको कुल बजेट ९ करोड ९९ लाख १७ हजारमा ८ करोड ७४ लाख ५० हजार खर्च गर्दा साढे ८७ प्रतिशत वित्तीय प्रगति भएको कार्यालय प्रमुख इन्जिनियर दयाराम अधिकारीले बताए ।

भवन तर्फको कुल बजेट ५५ लाखमा ३३ लाख ७७ हजार खर्च हुँदा वित्तीय प्रगति ६१ प्रतिशत भएको कार्यालयले जनाएको छ । कार्यालयका अनुसार अन्यमा ७५ लाख कुल बजेट मध्ये ४९ लाख ५० हजार खर्च गर्दा झण्डै ६६ प्रतिशत वित्तीय प्रगति देखिन्छ । समग्रमा गएको वर्ष कार्यालयको वित्तीय प्रगति ८० दशमलव  ५८ प्रतिशत रहेको छ ।  

पूर्वाधार कार्यालयले वहुवर्षिय सडकमा नागडाँडा–कार्किनेटा ९ दशमलव  ५, हेल–अर्जुचौपारी ६ दशमलव  २ र मिर्दि–क्याक्मी हुँदै तनहुँको भीमाद जोड्ने १० किलोमिटर सडक निर्माण सम्पन्न गरेको छ । उक्त सडक ढलान सहित झण्डै ४० किलोमिटर कालोपत्रे गरिएको कार्यालयले जनाएको छ । 

पूर्वाधार कार्यालयले ‘एक निर्वाचन क्षेत्र, एक कृषि सडक’ अन्तर्गत ढडुवा–ठूलाडिही–मर्सगा, खड्केटारी–पञ्चासे, आमडाँली–थापाडाँडा–रसखोला हुँदै केवँरे र दिमिक फाँटदेखि–अर्सेदीफाँट जोड्न कुल बजेट ३ करोड एक लाख ७३ हजारमा २ करोड ८३ लाख ६१ हजार खर्च गरेर सडक निर्माण गरेको छ ।

प्रादेशिक ‘क’ वर्गको सडकमा कुल विनियोजित ४ करोड ९० लाख ५० हजार बजेट मध्ये वालिङ–हुवास, ज्यामिरे–कोल्मा हुँदै थुम्कीडाँडा र शालिग्राम करिडोर लोकमार्ग २ करोड ८८ लाख १५ हजार खर्च गरेर निर्माण कार्य थालनी गरेको कार्यालयका निमित्त प्रमुख इन्जिनियर शिवजी प्रसाद ढुङ्गानाले बताए ।

“गएको आर्थिक वर्षमा स्थानीय पूर्वाधार विशेष कार्यक्रममा कुल २ करोड ९५ लाख बजेट थियो ।” निमित्त प्रमुख ढुङ्गानाले भने, “उक्त बजेटबाट मर्तमास–लोलुङ्ग मूलपानी सडक सम्पन्न भएको छ भने, थामडाँडा–गौखा हुँदै खाङराङ् भोर्ले र वयरघारी–बिरुवा खण्डमा २ करोड ७२ लाख ८६ हजारको लागतमा सडक निर्माणाधीन अवस्थामा रहेको छ ।”

कार्यालयले दिएको जानकारी अनुसार ‘एक निर्वाचन क्षेत्र, एक सडक’ आयोजनामा १३ करोड ६२ लाख ४९ हजार बजेट रहेको थियो । उक्र बजेटबाट नागडाँडा–कार्कीनेटा र बायाँटारी–उदियाचौर सेतीबेनी सडक निर्माण सम्पन्न गरेको छ भने, दामाचौर–हिलामराङ्ग हुँदै घुर्पाल दग्दी सडक निर्माणाधीन रहेको छ । विनियोजित बजेटमा १३ करोड ४६ लाख ३७ हजार खर्च भएको छ । 

उता स्थानीय तहका केन्द्र जोड्ने सडकमा २१ करोड ४६ लाख ३ हजार मध्ये पुतलीबजार–बिरुवा खण्डको राङ्खोला–धोबादी सडक, स्याङजाको हरिनास–तनहुँको शुक्लागण्डकी–दुलेगौडा, विर्घा गहलाम–बनकसा र भीरकोट–अर्जुनचौपारी जोड्ने सडकमा २० करोड ५४ लाख ६४ हजार खर्च भएको छ । 

पूर्वाधार कार्यालयले आर्थिक वर्ष २०८०÷०८१ मा ९ करोड ७१ लाख १७ हजार मध्ये ८ करोड ५० लाख ७८ हजारमा ६ वटा मोटरेबल पुल निर्माण थालनी गरेको छ भने, विनियोजित २८ लाख मध्ये २३ लाख ७२ हजारमा कटुजे–बडाचौर फेदीखोला र केवँरेखोला–ढाँवा अर्जुनचौपारीमा २ झोलुङ्गे पुल निर्माण गरेको छ ।