बागमतीमा मन्त्रालयको भागबण्डा नमिल्दा विथोलियो मन्त्रीको शपथ

१० साउन, हेटौंडा । बागमती प्रदेशमा मन्त्रालयको संख्या भन्दा मन्त्री बढी बनाएको र जिम्मेवारी फेरबदल गरेको विषयले उग्र रुप लिएको छ । जसका कारण आज साँझ ६ बजेलाई तय भएको शपथ ग्रहण कार्यक्रम अन्तिम समयमा आएर रोकिएको  छ । बागमतीमा सत्तारुढ दल नेपाली कांग्रेस र नेकपा एमालेबीच सहमति भएर मन्त्रालयको भागबन्डा गरिएको थियो ।

जसमा कांग्रेसले मुख्यमन्त्रीसहित ७ मन्त्रालय र एमालेले ६ मन्त्रालय लिने सहमति भएको थियो । कुल १३ मन्त्रालयमध्ये ६ मन्त्रालयको भाग पाएको कांग्रेसले बुधबार नै ३ जना मन्त्री नियुक्ति गरिसकेको थियो । कांग्रेसले बिहीबार थप ४ मन्त्रीको शपथ ग्रहण गर्ने तयारी गरेपछि विवाद बढेको हो । कांग्रेसले जिम्मेवारीसहित सुरजचन्द्र लामिछाने, प्रभात तामाङ, मीनकृष्ण महर्जन र विमल ठकुरीलाई मन्त्रीको शपथग्रहण गराउने गरी साँझ साढे ५ बजेको समय निर्धारण गरेको थियो । 

ठकुरीलाई संस्कृति पर्यटन तथा सहकारी मन्त्रालय, लामिछानेलाइ आन्तरिक मामिला तथा कानून मन्त्रालय, तामाङलाई आर्थिक मामिला तथा योजना मन्त्रालय र महर्जनलाई युवा तथा खेलकुद मन्त्रालयको जिम्मेवारी दिइएको थियो । यसअघि बुधबार नियुक्त भई शपथ गरेका कुन्दनराज काफ्ले,  श्याम बहादुर खड्का र मदु कुमार श्रेष्ठको जिम्मेवारी समेत तोकिएको थियो ।

जसमा काफ्लेले सामाजिक विकास मन्त्रालय, खड्काले खानेपानी, ऊर्जा तथा सिंचाई मन्त्रालय पाउने गरी जिम्मेवारी तोकिएको थियो भने श्रेष्ठको जिम्मेवारी पछि तोकिने गरी विना विभागीय मन्त्री बनाउने तय भएको थियो । सो निर्णयमा काफ्ले र श्रेष्ठले असहमति जनाएपछि शपथग्रहण कार्यक्रम भाँडिएको हो । काफ्लेले आर्थिक मन्त्रालय तोकेका थिए । तर उनलाई सामाजिक विकास मन्त्रालयको जिम्मेवारी दिने तयारी भएपछि काफ्ले मन्त्री पदमा नरहने निर्णयमा पुगेका थिए ।

त्यसैगरी विना विभागीय मन्त्री तोकिएपछि श्रेष्ठले जिम्मेवारी नतोकेसम्म अघि बढ्न नहुने अडान राखेपछि शपथग्रहण अन्योलमा परेको थियो । उत्ता नेकपा एमालेले भने कांग्रेसको निर्णयमा असहमति जनाएको छ । मन्त्रालयभन्दा बढी मन्त्री नियुत्त गर्न नहुने एमालेको भनाई छ । यसैबीच नयाँ मन्त्रीको स्वागतका लागि विभागीय मन्त्रालयका सचिवहरु गडी सहित प्रदेश प्रमुख कार्यालय पुगेकोमा शपथ ग्रहण कार्यक्रम विथोलिएपछि कर्मचारीको टोली र गाडीहरु रित्तै फर्किएका थिए ।