यस वर्षको मौद्रिक नीति पारित, घरजग्गा र शेयरबजार नीति लचिलो हुनेमा आशावादी

११ साउन, काठमाडौं । नेपाल राष्ट्र बैंकले मौद्रिक नीति पारित गरेको छ । शुक्रबार बिहान बसेको राष्ट्र बैंक सञ्चालक समितिले मौद्रिक नीति पारित गरेको हो । मध्यान्ह राष्ट्र बैंकको नयाँ कार्यालयमा मौद्रिक नीति सार्वजनिक गरिन लागेको छ । घरजग्गा र शेयरबजार मौद्रिक नीति लचिलो हुनेमा सबै विश्वस्त छन् । लचिलो कार्यदिशा राखिएको मौद्रिक नीति विगतका दुई वर्षभन्दा बढी कर्जा विस्तार गर्ने गरी आउने अनुमान गरिएको छ । 

कर्जा विस्तारको लक्ष्य गत वर्षकै हाराहारीमा भए पनि नियामकीय प्रावधान केही खुकुलो बनाएर दोहोरोअंकको कर्जा विस्तार होस् भन्ने गभर्नर लगायतको चाहना छ । स्रोतका अनुसार विगतमा भन्दा लचिलो मौद्रिक नीति आउँछ । शिथिल रहेको अर्थतन्त्र चलायमान बनाउन र बैंकहरूको खस्कँदो सम्पत्तिको गुणस्तर सुधार हुने गरी प्रमुख मौद्रिक औजारमा सामान्य हेरफेर गर्दै नियामकीय नीतिहरू परिमार्जन गर्ने गरी मौद्रिक नीति तयार भएको बताइएको छ । 

मौद्रिक नीति आर्थिक गतिविधि चलायमान बनाउनेमा नै हुने अपेक्षा गरिएको छ । मौद्रिक नीतिलाई बाँधेर राखेको नियामकीय नीतिमा आवश्यक परिमार्जन गर्नेमा मौद्रिक नीति लक्षित रहेको छ । केन्द्रीय बैंकले आफ्नो क्षेत्राधिकारभित्र रहेर शिथिल अर्थतन्त्रलाई चलायमान बनाउने गरी मौद्रिक नीति ल्याउनेछ ।