२३ वर्षपछि बैंकहरुको सम्पत्ति व्यवस्थापन गर्न छुट्टै कम्पनी खडा गर्ने राष्ट्र बैंकको घोषणा

११ साउन, काठमाडौं । नेपाल राष्ट्र बैंकले २३ वर्ष अघि एसेट म्यानेजमेन्ट कम्पनी अर्थात  बैंक तथा वित्तीय संस्थाको निस्किृय सम्पत्ति र गैरबैंकिङ सम्पत्ति व्यवस्थापन गर्न एउटा छुट्टै बैंक खोल्ने नीति लिएको कुरा आज नीतिमै ल्याएको छ । यसका लागि सम्पत्ति व्यवस्थापन कम्पनी स्थापनाका लागि सम्पत्ति व्यवस्थापन कम्पनी ऐनको मस्यौदा तर्जुमा गर्ने भएको छ ।

चालु आर्थिक वर्षको मौद्रिक नीति सार्वजनिक गर्दै गभर्नर महाप्रसाद अधिकारीले यस्तो व्यवस्था गर्ने बताएका हुन् । सम्पत्ति व्यवस्थापन गर्नुपर्ने विषयमा विगत लामो समयदेखि विषय उठ्दै आइरहेको थियो । यही विषयलाई समाधान गर्ने गरी राष्ट्र बैंकले बैंकहरूको गैंर बैकिङ सम्पत्ति व्यवस्था गर्ने लक्ष्यसहित कम्पनी नै खडा गर्ने नीति लिएको हो । 

शुक्रबार राष्ट्र बैंकका गभर्नर महाप्रसाद अधिकारीले एसेट म्यानेजमेन्ट कम्पनी स्थापनाको प्रक्रिया थालिने बताए । एसेट म्यानेजमेन्ट कम्पनीलाई ब्याड बैंक भनिन्छ । यस्तो कम्पनीले बैंक तथा वित्तीय संस्थाको निष्क्रिय कर्जा र गैरबैंकिङ सम्पत्ति खरिद गरेर सल्टाउने काम गर्दछ । ब्याड बैंक बैंकहरुको खराब कर्जाको व्यवस्थापन गर्नका लागि बनाइएको विशेष प्रकृतिको वित्तीय संस्था हो ।

नेपालको पहिलो मौद्रिक नीतिमा सम्पत्ति व्यवस्थापन कम्पनी (ब्याड बैंक) खोल्ने उल्लेख गरेको थियो । त्यसपछिको बजेटमा पनि उल्लेख भएअनुसार ब्याड बैंक स्थापनाका लागि अध्यादेश मस्यौदा तयार भएको थियो । गएको २३ वर्षसम्म पनि ब्याड बैंक स्थापना हुन सकेको थिएन । आज राष्ट्र बैंकले मौद्कि नीतिमै व्यवस्था गरेर ल्याएको छ ।