जहाज दुर्घटनामा परी मृत्यु भएकाहरुको शव आफन्तलाई बुझाउन थालियो, ५ वटा लगिए

११ साउन, काठमाडौं । त्रिभुवन अन्तर्राष्ट्रिय विमानस्थलमा भएको सौर्य एयरलाइन्सको विमान दुर्घटनामा निधन भएकाहरूको शव आफन्तलाई बुझाउन थालिएको छ । दुर्घटनामा मृत्यु भएकाहरूका केही आफन्तले भने शव बुझ्न अस्वीकार गरेका छन् । बीमा, क्षतिपूर्ति लगायतका विषय सरकार र विमान कम्पनीले प्रष्ट पारेपछि मात्र शव बुझ्ने उनीहरुको अडान छ ।
 
शव परीक्षण सकिएकाले आजै आफन्तलाई बुझाउने भनिए पनि क्षतिपूर्तिको विषयमा अझै सहमति हुन नसकेको हो । महाराजगन्ज प्रहरी वृत्तका डीएसपी अमर थापाका अनुसार ५ वटा शव भने अन्त्येष्टिका लागि लगिएको छ । उद्धव पुरी, अस्मिन निरौला, श्याम विन्दुकार, सुशान्त कटुवाल र राजाराम आचार्यको शव आफन्तले बुझेका डीएसपी थापाले बताए ।

शव बुझ्ने हतारोमा मृतकका आफन्तहरू शिक्षण अस्पतालमा जम्मा भएका छन् । केही मृतकका परिवार तथा आफन्तले भने शव हेर्न भित्र बोलाएर जबर्जस्ती शव बुझेको कागजमा हस्ताक्षर गर्न गराउन लगाएको आरोप समेत लगाएका छन् । त्रिवि शिक्षण अस्पतालका फरेन्सिक विभागका प्रमुख डा. गोपाल चौधरीका अनुसार पहिचान भइसकेका शवहरू आजै आफन्तलाई जिम्मा लगाउने तयारी भइरहेको छ ।

बुधबार बिहान ११ः११ बजे काठमाडौं स्थित त्रिभुवन विमानस्थलमा सौर्य एयरलाइन्सको जहाज दुर्घटना हुँदा १८ जनाको मृत्यु भएको थियो । विमान चालक मनिषरत्न शाक्यको भने काठमाडौँ मेडिकल कलेजमा उपचार भइरहेको छ । उनको स्वास्थ्यमा सुधार आएको अस्पतालले जनाएको छ ।

सौर्य एयरलाइन्सले विज्ञप्ति  जारी गरेर मृतकका परिवारलाई यथोचित सहयोग दिने बताए पनि बीमा रकम कति र कहिले पाउने प्रष्ट हुनुपर्ने आफन्तको माग छ । सौर्य एयरलाइन्सले दिने क्षतिपूर्ति, मृतकका छोराछोरीको शिक्षा, आश्रित परिवारको रोजगारी लगायतका विषयमा प्रष्ट भएपछि मात्र शव बुझ्ने केही आफन्तका परिवारको भनाइ छ । 

 यस्तो छ सौर्यको विज्ञप्ति