विमान दुर्घटनामा परेकामध्ये ११ जनाको शव परिवारले लगे, विदेशीसहित ७ जनाको बाँकी

१२ साउन, काठमाडौं । सौर्य एयरलाइन्सको जहाज दुर्घटनामा परी मृत्यु भएकाहरूको शव आफन्तलाई बुझाउने क्रम जारी छ । त्रिभुवन विमानस्थलमा भएको जहाज दुर्घटनामा परेका मध्ये ११ जनाको शव परिवारले बुझेका छन् । अब एक विदेशसहित ७ जनाको शव बुझाउन बाँकी छ ।  

त्रिवि शिक्षण अस्पतालमा पोस्टमार्टमपछि ११ जनाको शव आफन्तले बुझेका हुन् । अस्पतालका अनुसार दुर्घटनामा मृत्यु भएका एकै परिवारका तीन जना शव पनि परिवारले बुझेका छन् । विदेशी नागरिकको शव भने प्रक्रिया पूरा गर्नुपर्ने भएकोले बाँकी छ । अरु केहीका आफन्त विदेशबाट आउनु पर्ने भएकोले शव बुझाउन ढिला भएको अस्पताल प्रशासनले जनाएको छ । 

बुधबार पोखराका लागि उडेको सौर्य एयरलाइन्सको त्रिभुवन विमानस्थलमै दुर्घटना भएको थियो । दुर्घटनामा १८ जनको मृत्यु भएको थियो । पोस्टमार्टम सकिएसँगै शव पहिचान कार्य गरी आफन्तलाई बुझाउन थालिएको हो । १८ शवमध्ये १ महिला र बालकको शव पहिचानका लागि सहज भएको थियो । 

१२ शवलाई परिवारले दिएको विवरणअनुसार पहिचान गरिएको थियो । चार शव भने आगोले डढेका कारण पहिचान गर्न केही कठिन भएको थियो । मृतकका परिवारजनले बिमा र एयरलाइन्सले दिने क्षतिपूर्तिको पनि माग गरिरहेका छन् ।