रास्वपाको विवरण अद्यावधिक नगर्न मुकुल ढकालले दिए निर्वाचन आयोगमा निवेदन

१३ साउन, काठमाडौँ । राष्ट्रिय स्वतन्त्र पार्टी  (रास्वपा) का निलम्बित महामन्त्री डा. मुकुल ढकालले आफ्नो कारबाहीसम्बन्धी कुनै पनि पत्र अद्यावधिक नगर्न निर्वाचन आयोगलाई पत्र लेखेका छन् । आइतबार निर्वाचन आयोगमा दर्ता भएको पत्रमा ढकालले पदमुक्त गरिएको बारे आफूलाई जानकारी नभएको र यदि त्यस्तो पत्र आएमा अवैधानिक ठहर गर्दै अद्यावधिक नगर्न आग्रह गरिएको छ । 

रास्वपाको महामन्त्री, पार्टी प्रवक्ता र केन्द्रीय सदस्यबाट हटाउने निर्णय कार्यान्वयन नगर्न निर्वाचन आयोगमा निवेदन दिएका हुन् । ढकालले आयोगमा निवेदन दिँदै रास्वपाले आफूलाई पदबाट हटाएको पत्र अहिलेसम्म नपाएको र राजनीतिक दलसम्बन्धी ऐन अनुसार आयोगमा पार्टीको विवरण अद्यावधिक नगर्न आग्रह गरेका छन् । उनले आफूलाई सफाइको अवसर नै नदिएर पदबाट हटाइएको जिकिर गरेका छन् ।