निलम्बित मुख्यसचिव अर्याललाई थुनामा पठाउने कि धरौटीमा छाड्ने, निर्णय गर्दै विशेष अदालत

१३ साउन, काठमाडौं । विशेष अदालतले अन्तःशुल्क स्टिकर प्रकरणमा मुछिएका निलम्बित मुख्यसचिव बैकुण्ठ अर्याललाई थुनामा पठाउने कि धरौटीमा छाड्न भन्ने निर्णय गर्न लागेको छ । ३५ दिन कटाएर अर्याल अदालत हाजिर भएपछि विशेषले यस्तो निर्णय गर्न लागेको हो । विशेष अदालत स्रोतका अनुसार आफू विरुद्धको भ्रष्टाचार मुद्दामा बयान दिन उनी अदालतमा उपस्थित भएका छन् । 

अख्तियार दुरुपयोग अनुसन्धान आयोगले उनीविरुद्ध मुद्दा दायर गरेको ३५ दिन कटेको छ । उनी विशेष अदालतमा उपस्थित भएपछि बयान लिइनेछ । आइतबार अध्यक्ष टेकनारायण कुँवर र सदस्यहरू रामबहादुर थापा र रितेन्द्र थापाको इजलासमा उनले बयान दिनेछन् । 

बयान दिएपछि उनलाई थुनामा पठाउने, धरौटीमा वा साधारण तारिखमा रिहा गर्नेबारे आदेश हुनेछ । उनीमाथि निजी क्षेत्रको अन्तःशुल्क स्टिकर छाप्न सुरक्षण मुद्रण केन्द्रलाई ठेक्का दिँदा भ्रष्टाचार गरेको आरोप लागेको छ । भ्रष्टाचार मुद्दा दायर भएपछि उनलाई राष्ट्रिय योजना आयोगमा विशेष पद स्थापना गरी सरुवा गरिएको थियो ।