फर्कियो त्रिशूलीमा हराएका बस खोज्न आएको भारतीय टोली, नेपाली टोलीले भने निरन्तरता दिने

१३ साउन, काठमाडौं । त्रिशूलीमा बेपत्ता बसको खोजीका लागि नेपाल आएको भारतीय गोताखोरको टोली आज फिर्ता भएको छ ।  नेपाली टोलीले भने खोजि कार्य जारी नै राख्नेछ । असार २८ गते काठमाडौंबाट गौर जाँदै गरेको बस र वीरगन्जबाट काठमाडौं आउँदै गरेको बस एकसाथ त्रिशूली नदीमा खसेका थिए । दुवै बसमा गरी ६५ जना यात्रुमध्ये   तीन जना जीवितै फेला परेका थिए भने ६२ जना बेपत्ता भएका थिए ।

सिमलताल पहिरोमा परी त्रिशूलीमा बेपत्ता बस नभेटिएपछि भारतीय टोली आइतबार फर्किएको हो । त्रिशूलीमा बेपत्ता २ वटा यात्रुबाहक बस खोज्न साउन ४ गते १२ जनाको भारतीय टोली नेपाल आएको थियो । लगातार ८ दिनसम्म अत्याधुनिक प्रविधिसहित त्रिशूलीका विभिन्न ठाउँमा हराएका खोज्दा पनि नभेटिएपछि भारतबाट आएको टोली फर्किएको विपद् तथा द्वन्द्व व्यवस्थापन महाशाखा प्रमुख डा भीष्मकुमार भूसालले जानकारी दिए । 

शुक्रबार बस खोज्न भारतीय टोलीले ल्याएको चुम्बक नै हराएको थियो । अत्याधुनिक सोनार क्यामेरा लगायतका उपकरणसहित १२ सदस्यीय टोलीले खोजी कार्य सुरु गरेको थियो । भारतीय टोली फर्किए पनि नेपाली उद्धार टोलीले भने खोजी कार्य जारी राख्ने डा. उप्रेतीले जानकारी दिए ।  

सशस्त्र प्रहरीका सहप्रवक्ता डीएसपी शैलेन्द्र थापाका अनुसार भारतीय टोली फर्किए पनि सशस्त्र प्रहरी बलको उद्धार टोलीले भने खोजी कार्य जारी राख्नेछ । सशस्त्रसहित सेना र नेपाल प्रहरीको टोलीले निरन्तर त्रिशूलीमा खोजी कार्य गरिरहेने छ ।  नियमित वर्षाका कारण त्रिशूलीमा पानीको बहाब बढ्दा खोजीकार्य प्रभावित हुँदै आएको छ ।