कांग्रेस-एमाले मिल्नुपर्छ र संविधान संशोधन गर्नुपर्छ भन्ने कुरा मैले यत्तिकै उठाएको होइनः कोइराला

१३ साउन, काठमाडौं । नेपाली कांग्रेसका वरिष्ठ नेता डा. शेखर कोइरालाले नेपाली कांग्रेस र नेकपा एमालेबीच भएको समझदारी समान्य कामका लागि नभएको बताएका छन् । उनले कांग्रेस एमालेको मिलन सत्ताका लागि मात्र हो भनेर सोच्नु गलत हुने बताएका छन् । कोइरालाले दुई दल मिल्नुपर्छ र संविधान संशोधन गर्नुपर्छ भन्ने कुरा आफूले नै उठाएको दावी पनि गरेका छन् ।  

भारतको चण्डीगढमा आयोजित नेपाली जनसम्पर्क समिति भारत अन्तर्गत पश्चिमोत्तर क्षेत्रीय समिति चण्डीगढको १२ औँ अधिवेशनलाई सम्बोधन गर्दै नेता कोइरालाले निरंकुशता बिरोधी हरेक प्रजातान्त्रिक आन्दोलनमा भारतमा रहेका प्रवासीहरुले ठूलो योदान पुर्याएको बताए । उनले प्रवासी नेपालीहरुले पनि नेपालमा रोजगारी सिर्जना हुने खालका काममा लगानी ल्याउन पहल गर्नुपर्ने बताए ।  

भारतमा रहेका कांग्रेस पार्टीका मात्रै नभई सम्पुर्ण नेपालीहरुले पुर्याएको योगदानको उच्च प्रशंसा गर्दै उनले नेपालमा गरिखाने अवस्थाको सिर्जना गर्न, लगानी गर्ने बातावरण सिर्जना गर्न र रोजगारीको अवस्थाको सिर्जना गर्न सक्छु भन्ने अठोट आफूमा रहेको बताए । उनले नेपाल बनाउन केही त्याग गर्न आवश्यक भएको उनको भनाइ छ । 

अस्थिर सरकारका कारण देशमा संकट आएको उनको भनाइ छ । कांग्रेस र एमाले मिलेर संविधान संशोधन गरी मुलुकलाई स्थायी सरकार दिनैपर्छ भन्ने एजेन्डा शुरुदेखी आफुले उठाएको बताए । हरेक ६÷६ महिनामा भैरहने सरकार गठन र बिघटनले देशलाई धरासयी बनाएको उनले बताए । कांग्रेस र एमालेले आफूबीच भएको समझदारी चाँडै कार्यान्वयनमा आउनुपर्ने बताए । 

उनले भने, ‘केवल सत्ता टिकाउन सधै साना–साना २÷४ सीट भएका दललाई बोकेर हिंडदा नेपालले प्रगती गर्न सकेन भन्ने कुरा मनमा आएर मैले नै केही समयदेखि  संसदमा रहेका पहिलो र दोस्रो दल एक ठाउँमा उभिनुपर्छ भन्ने बिषयलाई उठाएको हुँ । यसमा देशको स्वार्थ जोडिएको छ । देश बनाउने केही काम हुनुपर्छ । यो सरकारलाई कत्ति पनि गल्ती गर्ने छुट छैन् । सुशासनको नारालाई जनताको घर पुर्याएनपर्छ । भ्रष्टाचारको अन्त्य गर्नुपर्छ ।’