जहाज दुर्घटनामा मृत्यु भएका १७ जनाको शव बुझाइयो, यात्रु बीमा उपलब्ध गराउन कम्पनी तयार

१३ साउन, काठमाडौं । सौर्य एयरलाइन्सको जहाज दुर्घटनामा मृत्यु भएका १८ मध्ये १७ जनाको शव परिवार तथा आफन्तले बुझेका छन् । प्रतिनिधि सभाको आइतबारको बैठकमा जहाज दुर्घटनाबारे जानकारी गराउँदै संस्कृति, पर्यटन तथा नागरिक उड्डयनमन्त्री बद्री पाण्डेले विदेशी नागरिकको शव व्यवस्थापनका लागि नेपालमा दूतावास नभएकाले त्यसका लागि सम्पर्क र समन्वयको काम भइरहेको जानकारी दिएका छन् । 

यस्तै दुर्घटनाको मृतको यात्रु बीमा बापतको रकम छिटोभन्दा छिटो उपलब्ध गराउन कम्पनी तयार भएको उनले बताए । सौर्य एयरलाइन्सको बीमा प्रभु इन्स्योरेन्समा भएको र उक्त इन्स्योरेन्सले बेलायतस्थित लोयर्ट रिइन्स्योरेन्समा रिइन्स्योरेन्स गरेको उनले जनाए । 

उक्त कम्पनीसँगको छलफलपछि प्रभु इन्स्योरेन्सलाई छिटोभन्दा छिटो दुर्घटना बापतको यात्रु बीमा दाबी भुक्तानी गर्न निर्देशन समेत गरिसकिएको उनले जानकारी दिए । तर, आन्तरिक उडानमा यात्रुको दुर्घटना बीमा कम भएकाले सरकारले बीमा रकम बढाउने गरी बीमा विधेयक समेत अघि बढाइसकेको उनले जानकारी दिए ।

नेपालले २०१८ मा यात्रु बीमा सम्बन्धी मोन्ट्रल कन्फेन्सन १९९९ व्यवस्था गरेको छ । यो व्यवस्था अन्तर्राष्ट्रिय उडानका लागि मात्र लागू हुन्छ । हाल आन्तरिक उडानमा प्रतियात्रु २० हजार डलर बीमा रहेको र सो यात्रु उडानमा मात्र रहेको छ । आन्तरिक नियमित उडानका क्रममा रहने यात्रुहरूको बीमा रकम थोरै भएकाले यसलाई बढाउने गरी उड्डयन बीमा विधेयक तर्जुमा गर्ने सन्दर्भमा सरकारले आवश्यक प्रक्रिया समेत अघि बढिसकेको छ’ मन्त्री पाण्डेले जानकारी दिए ।

साउन ९ गते त्रिभुवन अन्तर्राष्ट्रिय विमानस्थलबाट उडेको केहीबेरमै सौर्यको जहाज दुर्घटना भएको थियो। १७ जना नेपाली र एक विदेशीको दुर्घटनामा मृत्यु भएको थियो ।