कृषि समिति सभापतिमा कांग्रेसकी थापामगर चयन हुँदै

१४ साउन, काठमाडौं । प्रतिनिधिसभाको कृषि, सहकारी तथा प्राकृतिक स्रोत समितिको सभापतिमा नेपाली कांग्रेसकी सांसद कुसुम थापामगरले उम्मेदवारी दिएकी छन् । यसअघि समितिकी सभापति आरजु देउवा राणा परराष्ट्रमन्त्री बनेपछि पद रिक्त रहेको थियो । एकल उम्मेदवारी भएकोले आजै उनी सभापनितमा चयन हुँछन् ।  

कांग्रेस सांसद वीरबहादुर बलायर प्रस्तावक र नेकपा एमालेका सांसद सूर्यप्रसाद ढकाल समर्थनमा थापामगरको एकल उम्मेदवारी दर्ता भएको हो । दिउँसो १ बजेदेखि ४ बजेसम्मका लागि उम्मेदवारी दर्ताको समय तोकिएकोमा अहिलेसम्म थापाको मात्रै एकल उम्मेदवारी दर्ता भएको छ । 

संघीय संसद सचिवालयका सहसचिव एवम प्रवक्ता एकराम गिरीका अनुसार एकल उम्मेदवारी परेकाले सम्भवतः सर्वसम्मत सभापतिमा चयन हुनेछिन् । यद्यपि निर्वाचन कार्यतालिकाअनुसार साढे ४ बजेका लागि सम्बन्धित समितिको बैठक बोलाइएको र उक्त बैठकले निर्णय गर्नेछ ।