मूख्यसचिवका प्रतिस्पर्धीलाई चलाइएन, बाँकी सचिवको सरुवा

१५ साउन, काठमाडौं । सरकारले सचिवहरूको व्यापक सरुवा गरेको छ । मन्त्रिपरिषद्को सोमबार बसेको बैठकले केही विवादित सचिवहरू समेतलाई जिम्मेवारी दिएर सरुवा गरेको हो ।

अर्थमन्त्री विष्णु पौडेलले गुल्मीका रामप्रसाद घिमिरेलाई अर्थ सचिवमा ल्याएका छन् । अर्का राजश्व सचिवमा उद्योगबाट दिनेशकुमार घिमिरे ल्याएका छन् । अर्थमन्त्री वर्षमान पुन हुँदाका अर्थ सचिव मधुकुमार मरासिनीलाई उपराष्ट्रपतिको कार्यालय सरुवा गरेर राजस्व सचिव रामप्रसाद घिमिरेलाई अर्थ सचिव बनाइएको हो । मरासिनी भ्रष्टाचार अभियोगमा केही महिना अघि मात्रै विशेष अदालतबाट सफाई पाएर अर्थमन्त्रालयमा फिर्ता भएका थिए ।

वाणिज्य तथा आपूर्ति मन्त्रालयका सचिव दिनेशकुमार घिमिरेलाई अर्थमा ल्याएर मन्त्री पौडेलले आफूलाई सहज बनाएका छन् ।  संघीय मामिला तथा सामान्य प्रशासन सचिव मुकुन्द निरौलाको श्रम रोजगार तथा सामाजिक सुरक्षा मन्त्रालयमा सरुवा गरिएको छ । संघीय मामिलामा सार्वजनिक खरिद अनुगमन कार्यालयका सचिव भरत सुवेदीलाई ल्याइएको छ।

श्रम सचिव घनश्याम उपाध्यायलाई अख्तियार दुरुपयोग अनुसन्धान आयोगमा सरुवा गरिएको छ । उपराष्ट्रपति कार्यालयकी सचिव राधिका अर्याललाई सञ्चार तथा सूचना प्रविधि सचिव बनाइएको छ भने सञ्चारबाट सचिव रामकृष्ण सुवेदीलाई सार्वजनिक खरिद अनुगमन कार्यालय सरुवा गरिएको छ ।

अख्तियारका सचिव रामेश्वर दंगाललाई रक्षा मन्त्रालय ल्याएर रक्षाका सचिव किरणराज शर्मालाई प्राकृतिक स्रोत तथा वित्त आयोग पठाइएको छ । उनी अमेरिकी पीआरधारी सचिव भएकाले विवादमा आएका थिए । वित्त आयोगका सचिव मधुसूदन बुर्लाकोटी वाणिज्य तथा आपूर्ति सचिवमा सरुवा भएका छन् । राष्ट्रपति कार्यालयका सचिव डिल्लीराम शर्मा लोकसेवा आयोग पुगेका छन् ।

लोकसेवा आयोगका सचिव राजकुमार श्रेष्ठ प्रधानमन्त्री तथा मन्त्रिपरिषद् कार्यालय सरुवा भएका छन् । प्रधानमन्त्री तथा मन्त्रिपरिषद्को कार्यालयका सचिव नारायणप्रसाद दुवाडीको राष्ट्रपति कार्यालयमा सरुवा भएको छ । यसपल्ट दुवाडीलाई मन्त्रालय दिने तयारी भएपनि कांग्रेसले उनको साथ लिन नचाहेको एक मन्त्रीले जनाए ।

भूमि व्यवस्था, सहकारी तथा गरिबी निवारण मन्त्रालयका सचिव गोकर्णमणि दुवाडी राष्ट्रिय तथ्याङ्क कार्यालयमा तथा भूमिमा राष्ट्रिय तथ्याङ्क कार्यालयका अर्जुनप्रसाद पोखरेलको सरुवा भएको छ । नेपाल ट्रष्टमा राष्ट्रिय सतर्कता केन्द्रका सचिव रामआधार साह पुगेका छन् । उनी नापतौल तथा गुणस्तर विभागमा हुँदा विवादित बनेका थिए । सतर्कता केन्द्रमा प्रधानमन्त्री तथा मन्त्रिपरिषद्को कार्यालयका सचिव सरजु वैधको सरुवा भएको छ ।

भौतिक पूर्वाधार मन्त्रालयको सचिवमा जल तथा ऊर्जा आयोगबाट केशवकुमार शर्मालाई ल्याइएको छ । अख्तियार दुरुपयोग अनुसन्धान आयोगका केही आयुक्तसँग राम्रो सम्बन्ध भएका शर्मा भौतिकमा हुँदा विवादित थिए । अहिले बिचौलियाहरुले उनलाई त्यही सरुवा गरिदिएका छन् ।  ऊर्जा आयोगमा खानेपानी सचिव सुरेश आचार्यको सरुवा भएको छ ।

ऊर्जा मन्त्रालयमा भौतिकका गोपालप्रसाद सिग्देल पुगेका छन् भने खानेपानी सचिवमा नेपाल ट्रष्टबाट प्रमिलादेवी बज्राचार्यको सरुवा भएको छ । यो पल्ट दिनेश भट्टराई र एक नारायण अर्यालको सरुवा भएको छैन । उनीहरू दुवै जना मुख्यसचिवको प्रतिस्पर्धामा रहेका छन् ।