बागमतीका मुख्यमन्त्री लामाले विश्वासको मत लिँदै, कांग्रेस र एमालेकै मत पर्याप्त

१५ साउन, हेटौंडा । बागमती प्रदेशका मुख्यमन्त्री बहादुरसिंह लामाले आज मंगलबार विश्वासको मत लिँदैछन् । साउन ८ गते मुख्यमन्त्रीमा नियुक्त भएका लामाले एक सातामै विश्वासको मत लिन लागेका हुन् । मुख्यमन्त्रीले ३० दिन भित्र संसदबाट विश्वासको मत लिनुपर्ने संवैधानिक व्यवस्था छ । 

विश्वासको मत लिने प्रयोजनका लागि प्रदेश सभाको बैठक आज अपरान्ह तीन बजेका लागि बोलाइएको छ  । लामालाई विश्वासको मत दिन नेपाली कांग्रेसले ह्वीप नै जारी गरेको छ । मंगलबार हेटौंडा उपमहानगरपालिका–१०, स्थित प्रदेशसभा सचिवालयमा बसेको कांग्रेस संसदीय दलको बैठकले लामालाई विश्वासको मत दिन ह्वीप जारी गर्ने निर्णय गरेको हो । 

नेकपा एमालेको पनि विश्वासको मतसम्बन्धी निर्णय गरेको छ । दुई दलको मत भए लामालाई विश्वासको मत पुग्छ । लामालाई आफ्नै दल नेपाली कांग्रेसको ३७ र सत्ता साझेदार दल नेकपा एमालेको २७ जना सांसदको समर्थन छ । ११० सदस्यीय प्रदेश सभामा सरकारका लागि ५६ सांसदको बहुमत समर्थन आवश्यक हुन्छ । कांग्रेस र एमालेका गरी ६४ सांसद पुग्छन् । 

लामा ९ साउनमा एमालेको समर्थनमा नेपाली कांग्रेसको तर्फबाट मुख्यमन्त्री नियुक्त भएका थिए । १० साउनमा प्रदेश प्रमुख यादवचन्द्र शर्माबाट शपथ लिएका उनले त्यसको दुई दिनपछि मात्रै मन्त्रिपरिषद्लाई पूर्णता दिएका थिए । मन्त्री बन्ने आकांक्षी धेरै भएकाले नेपाली कांग्रेसभित्रको आन्तरिक विवादका बीच उनले दोस्रो पटकको प्रयासमा सरकार विस्तार गरेका थिए