दुई वर्षपछि म जान्छु र देउवाजी आउनुहुन्छ, सो अनुसार एक्सन ओरिएण्टेड भएर काम गर्नुः प्रधानमन्त्री

१५ साउन, काठमाडौं । प्रधानमन्त्री केपी शर्मा ओलीले आफू दुई वर्षभित्रमा असाधारण काम सम्पन्न गर्ने जिम्मेवारीका प्रधानमन्त्री बनेकाले सबैले एक्सन ओरिएण्टेड भएर काम गर्नुपर्ने बताएका छन् । मुलुकको गम्भीर परिस्थितिमा दुई प्रमुख दलको सहभागितामा सरकार बनेकाले यसलाई असफल हुने छुट नरहेको र छुट हुन नदिइने उनले बताएका छन् । उनले दुई वर्ष पछि अर्को प्रधानमन्त्री आएपनि एजेण्डा,उदेश्य र नीति एउटै हुने बताए ।  

नेपालका सरकारका सचिवहरुलाई आज प्रधानमन्त्री तथा मन्त्रिपरिषद्को कार्यालयमा निर्देशन दिँदै प्रधानमन्त्री ओलीले अघिल्लो सरकारबाट काम हुन नसकेको र जनतामा निराशा छाएकाले दुई प्रमुख पार्टीको अगुवाइमा सरकार परिवर्तन गर्नुपरेको बताए । उनले अहिलेदेखि योजना अनुसार काम गर्न निर्देशन दिँदै प्रधानमन्त्री ओली वा देउवा भएर फर नपर्ने बताए । 

यी दुई पार्टी मुलुकको आर्थिक, सामाजिक रुपान्तरणमा विशेष योगदान दिँदै आएका पार्टी हुन् । राणाकालदेखि राजतन्त्रसम्मको आन्दोलनमा जितेर आएका यी पार्टीको मुलुकको विकास र परिवर्तनका लागि हिस्सा र मुख्य भूमिका रहेको छ । त्यसकारण यो सरकारको काँधमा असाधारण जिम्मेवारी छ । यसलाई असफल हुने छुट छैन, उनले भने । 

उपप्रधानमन्त्री, मन्त्रीहरुलगायत विशिष्ट पदाधिकारी सहभागी बैठकमा प्रधानमन्त्री ओलीले भने,  असफल हुँदैन भनेर हामी हातमा हात बाँधेर बसेर आरामले बसेर चाहीँ सफल हुँदैन । भाग्यमा छ भन्दैमा डोका दूध दोएर अडिदैँन । हामीले सफलताको संकेत यस आर्थिक वर्षमा दिनुपर्छ । अर्काे आर्थिक वर्षमा त्यो सफलता बढाउँदै लानुपर्छ । यो सरकार एक्सन ओरिएन्टेड सरकार हो ।’

यो सरकारले को पक्ष र को प्रतिपक्ष भन्ने आधारमा भेदभाव नगर्ने भन्दै विना आग्रह मूल्यांकन गरेर निर्णयमा जाने बताए । यो सरकार पनि कति दिन चल्ने हो र भनेर भ्रम फैलाउनेहरुलाई त्यसो नगर्न उनले आग्रह गरे । प्रधानमन्त्री ओलीले आफूले सहमति बमोजिम दुई वर्ष पुग्ने एक साता अघि राजीनामा दिने त्यसपछि नेपाली कांग्रेसका सभापति शेरबहादुर देउवाको नेतृत्वमा बनेर स्थिरता सन्देश दिने स्पष्ट गरे । उनले जो प्रधानमन्त्री भएपनि एजेण्डा एउटै भएको उनले बताए ।