मंगलबार नेप्से २७ सय विन्दु नजिक पुग्दा १७ अर्ब २६ करोडको भयो शेयर कारोबार

१५ साउन, काठमाडौं । मंगलबार शेयरबजार २७ सय विन्दु नजिक पुगेको छ । यो कारोबार दिन नेप्से परिसूचक दोहोरो अंकले बढेर बन्द भएको छ । अघिल्लो कारोबार दिन २० अंकले करेक्सन आएको बजारमा आज ३५.५५ अंकले बढेर परिसूचक २६९६.६५ विन्दुमा पुग्यो ।

नेप्से बढे पनि कारोबार रकम भने सोमबारको तुलनामा घटेको छ । यसदिन ३२९ स्क्रिप्टको ४ करोड ३ लाख ७१ हजार ७७८ कित्ता शेयर १७ अर्ब २६ करोड ६३ लाख ९१ हजार ५४२ रुपैयाँमा खरिदबिक्री भए । सोमबार १९ अर्ब ६० करोड ९१ लाख रुपैयाँको शेयर कारोबार भएको थियो । आइतबार १५ अर्ब ८१ करोडको शेयर कारोबार भएको थियो । 

नेप्से दोहोरो अंकले बढ्दा ६ कम्पनीको शेयर सकारात्मक सर्किट लेभलमा कारोबार भएको छ । आधा दर्जन कम्पनीको शेयर सकारात्मक सर्किट लेभलमा कारोबार हुँदा एसियन हाइड्रोपावरका लगानीकर्ताले भने गुमाए। सो कम्पनीको शेयर १० प्रतिशतले घट्यो ।

यसदिन कारोबार रकमका आधारमा हिमालयन रिइन्स्योरेन्स शीर्षस्थानमा रह्यो । सो कम्पनीको ६० करोड मूल्य बराबरको शेयर कारोबार भयो । यसैगरी शिवम् सिमेन्टले ३७ करोडको शेयर कारोबार गर्दा सोल्टी होटलले ३६ करोड,नेपाल फाइनान्सले ३५ करोड र चिलिमे हाइड्रोपावरले २७ करोड मूल्य बराबरको शेयर कारोबार गरे ।

चार समूहको उपसूचकबाहेक अन्यको सूचक सकारात्मक देखिएका छन् । बैंकिङ, म्युचुअल फण्ड, नन लाइफ इन्स्योरेन्स र ट्रेडिङ समूहको उपसूचकबाहेक अन्यको उपसूचक सकारात्मक देखिएका छन् । फाइनान्स र होटल एण्ड टुरिजम समूहको उपसूचक ५ प्रतिशत बढिले वृद्धि भएको छ । कारोबारमा आएका १८९ स्टकको मूल्य बढ्दा ४७ वटाको घट्यो भने ६ वटाको मूल्य स्थिर भयो । 

आज कारोबार रकम भने घटेको छ । १७ अर्ब २६ करोड ६३ लाख रुपैयाँको शेयर कारोबार भएको छ । नेपाल स्टक एक्सचेन्ज (नेप्से)का अनुसार कारोबार रकम एकै दिन दुई अर्ब ३४ करोड रुपैयाँ घटेको हो । यसदिन होटेल तथा पर्यटन, फाइनान्स, अन्य, लगानी, हाइड्रोपावर र विकास बैंक समूहका लगानीकर्ताले सर्वाधिक कमाएका छन् । यी समूहको परिसूचक २.४ देखि ५.९९ प्रतिशतसम्म बढेको छ ।