एआईजी ज्ञवालीलाई प्रदेश समन्वय विभागमा सरुवा प्रस्ताव

१५ साउन, काठमाडौं । नयाँ सरकार बने लगत्तै सीआईबीका श्याम ज्ञवालीलाई प्रदेश प्रहरी समन्वय विभागमा सरुवा तयारी भएको छ । प्रहरी महानिरीक्षक बसन्तबहादुर कुँवरको सिफारिसमा ज्ञवालीलाई चार महिनामै सीआईबीबाट हटाइन लागेको हो । 

रामदत्त जोशीको बढुवासँग प्रहरी प्रधान कार्यालयले उनलाई पदस्थापन गर्ने बहानामा ज्ञवालीको नियोजित रुपमा सरुवा गर्न लागिएको हो । स्रोतका अनुसार नेपाल प्रहरीले ६ जना प्रहरी अतिरिक्त महानिरीक्षक 'एआईजी' को सरुवा पदस्थापनको तयारी गरेसँगै ज्ञवालीलाई भदौ २६ मा घर जाने निहुँ बनाएर काम नभएको विभागको जिम्मेवारी दिन लागिएको हो । 

आफ्नै नातेदार समेत रहेका आईजीपी कुँवरले एआईजी ज्ञवालीलाई यसअघि उपत्यका प्रहरी कार्यालयबाट हटाएका थिए । भुटानी शरणार्थी अनुसन्धानमा सफल मानिएका एआइजी ज्ञवालीलाई हटाइएको थियो । अहिले स्रोतका अनुसार बढुवामा सिफारिस भएका रामदत्त जोशीको पदस्थापन अपराध अनुसन्धान विभागमा गर्ने तयारी रहेको स्रोतले जनाएको छ ।

एआईजी श्याम ज्ञवालीलाई प्रदेश समन्वय, दीपक थापालाई मानव स्रोत विभाग , टेकबहादुर तामाङ वा सुदीप गिरीलाई सीआईबी र भीम ढकाललाई महानगरीय प्रहरी कार्यालयमा जिम्मेवारी दिने गरी आइजीपीले गृहमन्त्रालयमा प्रस्ताव पठाइसकेका छन् । मन्त्रालयले आगामी बिहिबारको मन्त्रिपरिषद बैठकमा पेश गर्ने स्रोतले जनाएको छ ।