यस आर्थिक वर्षमा १० अर्बबाट आन्तरिक ऋण उठाउन सुरु, राष्ट्र बैंकले आजै ४० अर्ब तरलता खिच्ने

१६ साउन, काठमाडौं । सरकारले आजबाट आन्तरिक ऋण उठाउन थालेको छ । नयाँ आर्थिक वर्ष सुरु भएपछि पहिलो पटक १० अर्ब ऋण उठाउन लागिएको हो । बुधबार १० अर्ब बराबरको आन्तरिक ऋण उठाउने तयारी गरेको छ । सार्वजनिक ऋण व्यवस्थापन कार्यालयले साउन १६ गते १० अर्ब रुपैयाँबराबरको विकास ऋणपत्र २०९२ जारी गर्न लागेको हो ।

ऋण व्यवस्थापन कार्यालयका अनुसार उठाउने ऋण दिन इच्छुक आवेदकले बुधबार दिउँसो ३ बजेसम्म आवेदन दिन सक्नेछन् । ११ वर्ष अवधिको यो ऋणपत्र बैंक तथा वित्तीय संस्था, गैरबैंकिङ वित्तीय संस्था, बिमा कम्पनी, संगठीत संस्था तथा नेपाली नागरिकले खरिद गर्न पाउनेछन् । यो ऋणपत्रको ब्याजदर बोलकबोलबाट तय हुनेछ । 

यस्तै राष्ट्र बैंकले बजारबाट ४० अर्ब खिच्ने भएको छ । बैंक तथा वित्तीय संस्थामा तरलता धेरै भएपछि ४० अर्ब खिच्न लागिएको हो । राष्ट्र बैंकले बैंक तथा वित्तीय संस्थालाई साउन १६ गते अनलाइनमार्फत बोलकबोलमा सहभागी हुन भनेको छ । साउन १६ गतेदेखि भदौ ५ गतेसम्मका लागि राष्ट्र बैंकले निक्षेप संकलन गर्न लागेको हो ।

निक्षेप राख्न चाहने बैंक तथा वित्तीय संस्थाले घटीमा १० करोड र बढीमा ५ करोड रुपैयाँले भाग गर्दा निःशेष भाग जाने रकमसहित बोलकबोलमा सहभागी हुनुपर्नेछ । आन्तरिक ऋण पनि सरकारले यही साउन १७ गते लिनेछ र २०९२ साल साउन १७ गते सावाँ भुक्तानी गर्नेछ । यो ऋणको ब्याज सरकारले अद्र्धवार्षिक रुपमा भुक्तानी गर्नेछ ।