राष्ट्रपतिबाट तीन प्रदेश प्रमुख पदमुक्त, नयाँको आजै नियुक्ति

१६ साउन, काठमाडौं । राष्ट्रपति रामचन्द्र पौडेलले तीन प्रदेशका प्रदेश प्रमुखलाई पदमुक्त गरेका छन् । मन्त्रिपरिषदको सिफारिसमा बागमती प्रदेश प्रमुख यादवचन्द्र शर्मा, लुम्बिनी प्रदेश प्रमुख अमिक शेरचन र कर्णाली प्रदेश प्रमुख तिलक परियारलाई बुधबार पदमुक्त गरिएको हो । 

उनीहरूलाई पदमुक्त गर्न सोमबारको मन्त्रिपरिषद बैठकले राष्ट्रपति समक्ष सिफारिस गरेको थियो । आजै तीन प्रदेशमा नै नयाँ प्रदेश प्रमुख नियुक्त भएका छन् । राष्ट्रपति पौडेलले बागमतीमा दीपकप्रकाश देवकोटा, लुम्बिनीमा कृष्णबहादुर घर्ती मगर र कर्णालीमा यज्ञराज जोशीलाई प्रदेश प्रमुखमा नियुक्त गरेको राष्ट्रपति कार्यालयकी प्रवक्ता शैलजा रेग्मी भट्टराईले जानकारी दिइन् । 

देवकोटा कैलालीका हुन् भने घर्ती मगर रोल्पा र जोशी बझाङका हुन् । राष्ट्रपति पौडेलले नेपाल सरकार मन्त्रिपरिषद्को साउन १४ गतेको निर्णय र सिफारिसमा नेपालको संविधानको धारा १६३ को उपधारा (२) बमोजिम प्रदेश प्रमुखहरू नियुक्त गरेका हुन् । नेपाली कांग्रेस र नेकपा एमालेको गत असार १७ को सहमतिअनुसार केपी शर्मा ओलीको नेतृत्वमा संघीय सरकार गठन गरेपछि तीन प्रदेश प्रमुख परिवर्तन गर्ने निर्णय भएको थियो ।