संसद विजनेशविहिन भयो, विषयगत समितिले विचाराधीन विधेयक चाँडो टुंग्याउनु पर्योः सभामुख

१६ साउन, काठमाडौं । सभामुख देवराज घिमिरेले विषयगत समितिका सभापतिहरूलाई विचाराधीन विधेयकको विषय चाँडो टुंग्याउन आग्रह गरेका छन् । सहजीकरणको लागि आफू तयार रहेको भन्दै उनले समितिबाट विधेयकका काम छिटो सकिनुपर्नेमा जोड दिएका छन् । संसद विजनेशविहिन भएपछि सभामुख घिमिरेले सभापतिहरूलाई आफ्नो कार्यकक्षमा बोलाएर आज छलफल गरेका थिए । 

संसद प्रभावकारी बनाउन संसदीय समितिको सक्रियता रहनुपर्ने बताए । अहिले संसदमा विधेयक छैन । त्यो भनेको खास बिजनेस छैन । बिजनेस नभएपछि संसद चलाउन सकिँदैन । संसदलाई बिजनेस दिने वातावरण तयार गर्नुहोस् । समिति सञ्चालनका लागि आवश्यक पूर्वाधार, व्यवस्थापकीय सहयोग गर्न संसद सचिवालय तयार छ । समितिमा विचाराधीन रहेका विधेयकहरू टुंगोमा लगाउन विशेष तदारुकता देखाउनुहोस्, उनले भने । 

छलफलमा सभापतिहरूले तीन दिन संसद, तीन दिन समितिको बैठक सञ्चालन गर्ने पूर्वनिर्णय प्रभावकारी हुन नसकेको कांग्रेस सांसद रामहरि खतिवडाले बताए । संसद सकिनेबित्तिकै सांसदहरू गृहजिल्ला जाने हुँदा समितिको बैठक बस्न सकेन । समितिमा धेरै विधेयक छन्, तर जटिल प्रकृतिका छन् । कतिपय विधेयकमा राजनीतिक समिति चाहिएको छ, उनले भने ।  

सांसद विमला सुवेदीले बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग ऐन २०७१ लाई संशोधन गर्न बनेको विधेयक टुंगोमा लाग्ने तयारी रहेको बताइन् । एक दुई विषयमा राजनीतिक सहमति भए टुंगिने उनको भनाइ छ । सांसद अम्मरबहादुर थापाले शिक्षा विधेयकमा धेरै संशोधन भएको बताउँदै टुंगोमा पुर्याउन जनशक्तिको अभाव भएको बताए । बैठकमा सभापतिहरू रामहरि खतिवडा, विमला सुवेदी, अम्मरबहादुर थापा, अब्दुल खान, किरणकुमार साह, दीपकबहादुर सिंह सहभागी थिए ।