भ्रष्टाचारका फाइल कसैको दवाव र चाहनाले खोलिन्न , कानुन अनुसार खुल्छनः गृहमन्त्री लेखक

१७ साउन, काठमाडौं । गृहमन्त्री रमेश लेखकले भ्रष्टाचारका फाइल कसैको चाहना र दवावमा नभई कानुन अनुसार खोलिने बताएका छन् । उनले लोकतन्त्रमा कानुन बेगरको चाहनाले मुद्दा चल्न नसक्ने बताएका छन् । लोकतन्त्रका आधारभूत तत्व मध्ये विधिको शासन महत्वपूर्ण भएकाले त्यही अनुसार हुने जवाफ दिएका छन् । 

बिहीबार सिंहदरबारमा विकास, आर्थिक मामिला तथा सुशासन समितिको छलफलमा गृहमन्त्री लेखकले विभिन्न प्रकरणमा फाइल खोल्ने विषयमा सांसदहरूले राखेको जिज्ञासामा लोकतन्त्रमा कानून बेगर मुद्दा चल्न नसक्ने बताए । उनले भने, ‘फाइल खोल्ने भन्या के हो ? मुद्दा चलाउने भन्या होला नी, लोकतन्त्रमा मुद्दा कानून बेगर चल्छ ?, रहरमा मुद्दामा चल्दैन, कसैका चाहनाले मुद्दा चल्दैन, कानून बमोजिम चल्छ भन्ने मेरो आग्रह छ, उनले भने । 

कुनै मुद्दा चलेको छ भने छुट्न पनि कानून बमोजिम छुट्छ भन्ने कुरा सांसदहरूले बुझ्नुपर्ने बताए । सदाचार मानिसले आफ्नो भित्रबाट राम्रो गर्न उत्प्रेरित गर्ने विषय हुनुपर्छ भन्दै उनले यो विषयलाई सरकारले प्राथमिकतामा राखेर प्रतिवद्धता अनुसार काम गर्छ र समितिबाट सरकारलाई यसमा आवश्यक सुझाव हुनुपर्ने बताए । प्रहरी कर्मचारी सरुवाको विषय निरन्तरको प्रक्रिया भएको उनले बताए ।

कर्मचारीको सरुवा र बढुवा हुन्छ । कहिले काँही सामान्यतया अवधि तोकेको हुन्छ । तर कहिले काही अवधि भन्दा पहिले पनि हुन्छ । जुन पदको सरुवाको कुरो छ उहाँ अत्यन्त योग्य मानिस हो, र योग्यतम ठाउँमा पुग्नु भएको छ । किनभने प्रहरीलाई तालिम दिने भन्या त सबैभन्दा बढी पढे लेखेको चाहियो नी, प्रहरी राम्रो बनाउनु पर्यो । अनि राम्रो प्रहरीलाई राम्रो तालिम दिन राम्रो मान्छे पठाउँदा के समस्या भयो उनले भने ।